भांगरभूंय | प्रतिनिधी
अज्ञाता आड गुन्यांव दाखल : लोकां मदीं तिडक
भांगरभूंय । प्रतिनिधी
वाळपय : वाळपय नगरपालिका वाठारांतल्या भौशीक सुवातेर जितेंद्र काटकार हांच्या घरा मुखार गोरवांचीं हाडां उडयल्यान काटकार कुटुंबान खर तिडक उक्तायली. शांतता भंग करपाचो यत्न करपी अज्ञाता आड कारवाय करपाची मागणी काटकार हांणी केल्या. तशेंच ह्या वाठाराच्या लोकप्रतिनिधीन आनी नगराध्यक्षान ही गजाल गंभीरतायेन घेवची, अशेंय ताणें मागलां.
मेळिल्ले म्हायती प्रमाण जितेंद्र काटकार हांचें घर वाळपय शारांत म्हत्वाच्या वाठारांत आसा. दनपारां दारां मुखार गोरवांचीं हाडां उडयल्ल्याचें नदरेक पडलें. ताणें हे संबंदांतली कागाळ पुलीस चौकीर केली. पुलिसांनी येवन पळोवणी केली तशेंच पशुवैजकी अधिकाऱ्यांक आपोवन हे संबंदांत तपासणी केली. तीं हाडां गोरवांचीं आशिल्ल्याचें कळ्ळें. पुलिसांनी हाडां जप्त करून अज्ञाता आड गुन्यांव दाखल केला.
मजगतीं, ह्या प्रकारा आड लोकांनी लेगीत खर तिडक उक्तायल्या. अश्यो घडणुको आतां वाळपय शारांत घडपाक लागल्यात. फुडारांत हाचे गंभीर परिणाम जावपाची शक्यताय न्हयकारपाक जायना. हे आदीं लेगीत खूब खेपे वाळपय शारांत तणाव निर्माण करपाचो यत्न कांय घटकां कडल्यान केला, अशें लोकांनी सांगलें. मजगतीं, वाळपय पुलिसांनी अज्ञाता आड गुन्यांव दाखल केला. ह्या संबंदांत तपास चालू आशिल्ल्याचें पुलीस सुत्रांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
