भांगरभूंय | प्रतिनिधी
पणजी : येवपी १९ डिसेंबर मेरेन राज्यांतले आडकून उरिल्ले रान हक्क दावे निकालांत काडपा खातीर विवीध पांवड्यार बसकांचें सत्र सुरू आसा. बिरेस्तारा एकाच दिसा उत्तर गोंयांत ४५ जाल्यार, गोंयांत १०४ मेळून १४९ वन हक्क दाव्यांक मान्यताय दिली. उत्तर गोंयांत झर्मे – सत्तरीच्या ३८ अर्जांक मान्यताय दिली.
उत्तर गोंयचे जिल्लोधिकारी अंकीत यादव आनी दक्षीण गोंयची जिल्लोधिकारी एग्ना क्लेटस हांचे कडल्यान ही म्हायती मेळ्ळी. रान हक्क दावे निकालांत काडपा खातीर जिल्लो समितीच्यो नेमान बसका जातात. येवपी १९ डिसेंबर मेरेन आडकून उरिल्ले रान हक्क दावे निकालात काडपाचें उद्दीश्ठ आसा, अशें उत्तर गोंयची जिल्लोधिकारी अंकीत यादव हांणी सांगलें. रान हक्क कायद्या खाला जमनीच्या मालकी हक्कां खातीर १० हजार ५०० अर्ज आयिल्लेे. अर्ज २००६ सावन आडकून आशिल्ले. जुनांत मुख्यमंत्र्यांनी रान हक्क दावे वेगान निकालांत काडपा खातीर बसका घेतली आनी अधिकार्यांक गरजेच्यो सुचवण्यो दिल्यो. १० हजार ५०० अर्जां मदल्या सुमार ३ हजार अर्ज निकालांत काडल्यात. ७ हजार ५००च्या लागीं अर्ज प्रलंबीत आसात. रान हक्क अर्जांक सगल्यांत पयलीं ग्रामसभेन मान्यताय दिवची पडटा. उपरांत अर्ज राज्य पातळीवेले (एसडीएलसी) समिती कडेन धाडटात. हे समितीन मान्यताय दिले उपरांत जिल्लो पांवड्यार समिती अर्जांक मान्यताय दिता. जिल्लो समितीन मान्यताय दिले उपरांत जिल्लोधिकारी सनद जारी करतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
