भांगरभूंय | प्रतिनिधी
नवी दिल्ली, खबरां संस्था : इलेक्ट्रोरल बाँडस् असोसिएशन फॉर डेमोक्रॅटीक रिफॉर्म्स (एडीआर) न ४० प्रादेशीक पक्षांचो उत्पन्न अहवाल प्रसिद्ध केला. ह्या पक्षांनी २०२३- २४ ह्या अर्थीक वर्सांत वट्ट २५३२.०९ कोटी रुपया उत्पन्न जाहीर केलां. हांतलें ७० टक्क्यां परस चड, सुमार १७९६.०२४ कोटी रुपया वेंचणूक रोख्यांतल्यान आयलां. गोवा फॉरवर्ड पक्षान कसलेंच उत्पन्न जाहीर करूंक ना मात १.५६ लाख रुपया खर्च जाहीर केला.
अहवाला प्रमाण, भारत राष्ट्र समितीन (बीआरएस) सगल्यांत चड ६८५.५१ कोटी रुपया उत्पन्न नोंद केलें. उपरांत तृणमूल कॉंग्रेस (टीएमसी) ६४६.३९ कोटी रुपया आनी बिजू जनता दल (बीजेडी) २९७.८१ कोटी रुपया उत्पन्ना सयत दुसर्या नंबराचेर आसा.
त्याच वेळी, तेलुगू देसम पक्षान (टीडीपी) २८५.०७ कोटी रुपया आनी वायएसआर कॉंग्रेसीन १९१.०४ कोटी रुपया जोडले. ह्या पांच पक्षांक ४० प्रादेशीक पक्षांनी घोशीत केल्ल्या वट्ट उत्पन्ना मदलें ८३.१७ टक्के उत्पन्न मेळ्ळें.
एडीआरान म्हणलां, २०२२-२३चे तुळेंत पक्षांचें उत्पन्न ४५.७७ टक्क्यांनी वाडलां. २०२२-२३ वर्सा ह्या पक्षांचें उत्पन्न १,७३६.८५ कोटी रुपया आशिल्लें. तेन्ना टीएमसीन सगल्यांत चड ३१२.९३ कोटी रुपया जोडिल्ले.
१२ राजकीय पक्षांनी तांच्या उत्पन्ना परस चड खर्च केलो
अहवाला प्रमाण, २७ प्रादेशीक पक्षांनी तांच्या उत्पन्नाचो कांय भाग खर्च जावंक नाशिल्ल्याचें सांगलें. बीआरएसान तांच्या उत्पन्नांतले ४३०.६० कोटी रुपया खर्च करूंक ना, टीएमसीन ४१४.९२ कोटी रुपया खर्च करूंक ना आनी बीजेडीन २५३.७९ कोटी रुपया खर्च करूंक ना.
वायएसआर कॉंग्रेस, द्रमुक, समाजवादी पक्ष आनी जेडीयू सयत १२ पक्षांनी तांच्या उत्पन्ना परस चड खर्च केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
