शॉर्टकटाचो नाद नाका

भांगरभूंय | प्रतिनिधी

चिंतन 35

जिणेंत येस मेळोवपाक कश्ट आनी धीर कितलो म्हत्वाचो, हें संत तुकारामान आपल्या अभंगांत सोबीतपणान सांगलां.

तरुवरा आधीं कोठें आहे फळ। 

चावटा बरळ म्हणा त्यासी॥

ह्या ओळींचो अर्थ खूब सादो आनी सोंपो आसा, पूण, ताचो अणभव आमचे दिसपट्टे जिणेंत आमकां सगले कडेन येता.

झाड रोंवचे पयलीं म्हूण खंयच्या झाडाक फळां येतात? तेच प्रमाण कश्ट करिनासतना रोखडेंच फळ मेळटलें, अशें कोणेंय म्हणलें जाल्यार तो फकत फाजील आनी कितेंय बडबडटा.

समजा, तुमी नवो वेवसाय सुरू करपाचो विचार करतात. तुमच्या मनांत खूब व्हड येवजण्यो आसात, पूण तुमी अजून एकूय पावल उखलूंक ना. अशा वेळार कोणेंय तुमकां सांगलें, फाल्यांच तुमी करोडपती जातले, तुमी ताका कितें म्हणटले? तो फकत तुमकां सपनां दाखयता. कारण खंयचोच वेवसाय रोखडोच येसस्वी जायना. ताका खूब कश्ट, वेळ आनी संयम जाय पडटा.

गणेशान एक ल्हानसो ऑनलायन खाणां-जेवणांचो वेवसाय सुरू केलो. सुरवेक ताका चडशें गिरायक मेळूंक नाशिल्ले. कांय जाणांनी ताका रोखडोच व्हड फायदो मेळटलो अशें सांगलें, पूण हें शक्य ना हें ताका कळ्ळें. तो दर दिसा कश्ट करतालो. बऱ्या पदार्थांचीं रेसिपी शिकलो, सोशल मिडियाचेर मार्केटींग करपाक शिकलो. हें सगळें करतना ताका जायत्या अडचणींक तोंड दिवचें पडलें. केन्ना ऑर्डर उणी येताली, केन्ना चड आयिल्ल्यान ताका त्यो हाताळपाक मेळनाशिल्लें. पूण ताणें हार मानली ना. ल्हवू ल्हवू ताचो वेवसाय वाडपाक लागलो. आयज ‘घरगुती खाऊ’ ह्या नांवान ताचें बरेंच नांव जालां. आयज तो म्हणटा, ‘जशें झाडाक फळां येवंपाक योग्य वेळ दिवची पडटा, तशीच वेवसायांत येस मेळोवपाक वेळ दिवचो पडटा’.

हें फकत वेवसायाकूच लागू जायना, पूण आमच्या शिक्षणाक, करियराक वा खंयचेय नवे गजालीक लागू जाता. शॉर्टकटा वरवीं कसलेंच यश मेळना आनी जें मेळटा तें तिगना. कितेंय साध्य करपाक कश्ट करपा बगर पर्यायूच ना आनी येस मेळोवपाक संयम, धीर खूब गरजेचो. कश्ट आनी संयम एकामेकांक पूरक आसात. जाल्यारुच आमकां येसाचीं गोड फळां चाखपाक मेळटात. देखून कसलेच शॉर्टकट घेनासतना कश्टाचेर विस्वास दवरात आनी शांतपणान वाट पळयात. तुमकां येस मेळटलें हें निश्चीत.

– हभप देवदत्त दिगंबर परुळेकर