भांगरभूंय | प्रतिनिधी
प्राचार्य श्रीकृष्ण नायक : सांखळे येरादारी नेम जागृती फेरी
भांगरभूंय । प्रतिनिधी
सांखळी : देवान दिल्लो आमचो जीव मोलादीक आसा. तो रस्त्याचेर येरादारी नेम मोडून वगडांव नाकात. आयज खूबशे विद्यार्थी दुचाकी चलयतना हॅल्मेट घालिनात. तशेंच चारचाकी चलयतना सीट बेल्ट वापरिनात. धोफरायक गाडये चलयिल्ल्यान ते स्वता वांगडाच हेरांचोय जीव धोक्यांत घालतात, हाची जाणीव दरेका विद्यार्थ्यान दवरची. आमी विद्यार्थी ह्या नात्यान स्वता जागरूक रावून समासजाक लेगीत जागृत करपाची जापसालदारकी दरेकान सांबाळची, असो उलो सांखळी उच्च माध्यमीक विद्यालयाचे प्राचार्य श्रीकृष्ण नायक हांणी मारलो.
गोंयांत चालू आशिल्ल्या रस्तो सुरक्षा सप्ता निमतान रस्तो येरादारी अधिकारी कार्यालया वतीन सांखळी शारांत सांखळी सरकारी उच्च माध्यमीक विद्यालयाच्या पालवान रस्तो येरादारी नेमांचे जागृती खातीर रॅली काडली. ह्या वेळार प्राचार्य नायक उलयताले. हे रॅलींत उच्च माध्यमीक विद्यालयाच्या विद्यार्थ्यांनी रस्तो येरादारी संबंदांत विवीध घोशणा दिवन पुराय वाठार हालोवन सोडलो.
ह्या वेळार दिवचल आरटीओचे सहाय्यक येरादारी संचालक संजय पारोडकार, आरटीओ निरिक्षक शिवानंद (सनी) पेडणेंकार, मिथुन रामनाथकार, अनुप कुंडयकार, रवींद्र सातार्डेकार, समीर प्रभू, येरादारी पुलीस विभागाचे पुंडलीक सावंत तशेंच व्हड संख्येन विद्यार्थी, विद्यालयाच्या शिक्षकांनी हे जागृती फेरयेंत वांटो घेतलो.
येरादारी नेम जागृती फेरी ही दर वर्सा येरादारी सप्तका निमतान आयोजीत करतात. हे फेरयेंत रस्तो वापरपी दरेके व्यक्तीक येरादारी नेमा संबंदांत जागृत करप ही आमची दरेकल्याची जापसालदारकी आसा. ह्या कायद्या विशीं स्वता जागृत जातनाच आपल्या कुटुंबाक लेगीत सदांच कायदो पाळपाक लावचो, अशें सहाय्यक येरादारी संचालक संजय पारोडकार हांणी सांगलें.
निरिक्षक शिवानंद पेडणेंकार हांणी सांगलें, अशे रॅलींत वांटेकार जाले उपरांत विद्यार्थ्यांनी स्वता येरादारी नेमा विशीं गंभीर जावचे, आपल्या कुंटुंबाक आनी इश्ट परिवाराक जागृत करचे. आयज ह्या विद्यार्थ्यां कडेन येरादारी परवानो नासलो तरी लेगीत येरादारी विशीं जागृती फेरींत वांटो घेतले उपरांत येरादारी नेम पाळपाक कर्तव्य भावनेन लक्ष दितले. आमी येरादारी नेम मोडून हेरांचोय जीव धोक्यांत घालतात, हाची दरेकल्यान जाणीव दवरची, अशें सांगलें. प्राध्यापक समीर प्रभू हांणी येवकार दिलो. सरकारी उच्च माध्यमीक विद्यालया कडल्यान सुरू जाल्ली रॅली सांखळी आवटपोस्ट, बाजार, पोरणो बसस्टॅण्ड, बाजारांततल्यान नव्या बसस्टॅण्डा कडेन आयली. बसस्टॅण्डाचेर उच्च माध्यमीक विद्यालयाच्या विद्यार्थ्यांनी पथनाट्य सादर करून येरादारी नेमा विशीं जागृती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
