भांगरभूंय | प्रतिनिधी
श्रीपाद नायक : नवी दिल्लींत वितरीत अक्षय उर्जा कार्यशाळा
खबरां संस्था
नवी दिल्ली : उर्जा ही मानवी उदरगतीची मुळावी गरज आसा. आमच्या दिसपट्टे जिणेंतली दरेक गजाल- अन्न, उदक, संवाद वा येरादारी ह्या सगळ्यांचो आदार विश्वसनीय उर्जेचे उपलब्धतेचेर आसा. तंत्रज्ञानाची उदरगत आनी अर्थीक वाड हाका लागून उर्जेचेर अवलंबून रावप आनीक वाडलां, अशें केंद्रीय उर्जा राज्यमंत्री श्रीपाद नायक हांणी सांगलें.
बुधवारा अटल अक्षय उर्जा भवन, नवी दिल्लींत नवें आनी नवकरणीय उर्जा मंत्रालय आनी आंतरराष्ट्रीय सौर आघाडी हांच्या जोडपालवान आयोजीत केल्ले वितरीत अक्षय उर्जा (डीआरए) कार्यशाळेंत केंद्रीय मंत्री नायक उलयताले. ह्या वेळार संतोष सारंगी (सचीव, नवी आनी नवकरणीय ऊर्जा मंत्रालय, भारत सरकार), अभय बाकरे (संचालक – राष्ट्रीय हरीत हायड्रोजन मिशन आनी समूह मुखेली, नवी आनी नवकरणीय मंत्रालय, भारत सरकार) तशेंच आशीष खन्ना (म्हासंचालक, आंतरराष्ट्रीय सौर आघाडी) हाजीर आशिल्ले. हे कार्यशाळेंत लॅटीन अमेरिकन आनी कॅरिबियन देशांतले राजदून आनी वरिश्ठ जारकी अधिकारी वांटेकार जाल्ले. उर्जेची वाडटी मागणी ही उर्जा सुरक्षेक राष्ट्रीय नदरेन खुबूच म्हत्वाचो विशय थारता. त्याच वेलार आमी उर्जा खंयच्यान मेळयतात हाचे दूरगामी परिणाम जातात. उर्जा आनी हवामान बदल हांचो परस्परसंबंद आनी ताचे वायट परिणाम उणे करचे खातीरच्यो उपाय येवजण्यो हांचेर विवीध माचयांचेर चर्चा जाता. पूण आपूण इतलेंच सांगपाक शकता, हवामान बदलाचे परिणाम हे पिळग्यान पिळग्यो आनी शिमे पलतडी वतले. ताका लागून उदरगत आनी प्रगती ही नितळ, आधुनीक, सगळ्यां खातीर उपलब्ध आशिल्ले उर्जेचेर आदारीत आसप खूब गरजेची. अक्षय उर्जेची उदरगत आनी प्रसार हो हे नितळ उर्जा संक्रमणाचो केंद्रबिंदू आसा, अशें केंद्रीय मंत्री नायक हांणी आपल्या मुख्य भाशणांक सांगलें.
2030 मेरेन 500 गीगावॅट अक्षय उर्जा : नायक
भारतान 2030 मेरेन 500 गीगावॅट अक्षय उर्जा तांक निर्माण करपाची मोख दवरल्या. ही मोख फक्त व्हड प्रकल्पांचे स्थापनेचेर ना जाल्यार विकेंद्रीत उर्जा उपायांचेर लेगीत आदारीत आसा. पाख्यां वयली सौरउर्जा, ऑफ- ग्रीड सौर पंप, मिनी- ग्रिड्स ह्या सारक्या विकेंद्रीत प्रणालींनी देशभरांत नितळ उर्जा उपलब्ध, परवडपी आनी विस्वसनीय करचे खातीर म्हत्वाची भुमिका वठयल्या, अशें केंद्रीय मंत्री श्रीपाद नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
