भांगरभूंय | प्रतिनिधी
पणजी: गोंय सरकाराच्या म्हायती आनी प्रसिध्दी खात्यान गोंय राज्य फोटो सर्त आनी प्रदर्शन येवजण २०१४ खाला प्रवेशिका मागयल्यात. फोटो सर्त दोन विभागांत दोन वेगळ्या विशयांत घेतली. विभाग-१ खातीर विकसीत गोंय-राज्याचो सर्वांगीण विकास आनी विभाग-२ खातीर गोंयचीं रानां आनी रानवटी जिवीत-गोंयची सैमीक सोबितकाय, दोंगर, तळीं, न्हंयों आदी विशय आसा.
दरेक प्रवेशिकेच्या फाटले वटेन फोटोग्राफराचें नांव, राष्ट्रीयता, पोस्टाचो नामो, मोबायल नंबर, टेलिफोन नंबर, ई-मेल नामो ब्लॉक लॅटर्सांनी बरोवपाक जाय. तशेंच फोटो खातीर वापरिल्ल्या कॅमेराची तांत्रीक म्हायती प्रवेशिके वांगडा जोडपाक जाय. प्रवेशिके खातीर मोबायल आनी ड्रोणान काडिल्ली प्रतिमा विचारात घेवपाक येवची ना. प्रवेशिके वांगडा फोटोची थोडेभितर म्हायती आनी फोटोग्राफराचो वयक्तीक तपशील चडांत चड १०० उतरांचो जोडपाक जाय.
प्रवेशिकाधारकांन हाय रिझोल्यूशनच्या फोटवासयत सॉफ्ट कॉपी धाडपाक जाय. प्रवेशिकाधारकान 12×8आकाराचो कलर प्रिन्ट सादर करपाक जाय आनी प्रत्येक वर्गात चडांत चड 4 वेगवेगळे फोटो धाडपाक शकता. हे सर्तींत वाटो घेवपा खातीर शुल्क ना, पिरायेची मर्यादा ना आनी पात्रतायेचीय गरज ना. ड्रोनावरवीं काडिल्ले फोटो स्विकारचे नात.
गोंयांत जल्मल्ल्या आनी फाटलीं 15 वर्सां गोंयांत राबीतो करप्यांक प्राधान्य दितले. प्रवेशिके वांगडा निवास दाखलो जोडपाक जाय.
दरेका वर्गांत पयलें इनाम रोख 20 हजार रुपया तशेंच ट्रॉफी आनी प्रमाणपत्र, दुसरें इनाम रोख 16 हजार रुपया तशेंच ट्रॉफी आनी प्रमाणपत्र तिसरें इनाम रोख 12 हजार रूपया आनी प्रमाणपत्र तशेंच दरेका वर्गात 2 हजार रुपयांचीं पांच उमेद वाडोवपी इनामां आनी प्रमाणपत्र दितले.
प्रवेशिकांचे फोटो हे म्हायती आनी प्रसिध्दी खात्याची मालमत्ता आसतली आनी तांचो वापर प्रदर्शना खातीर आनी ह्या खात्याच्या आनी गोंय सरकाराच्या हेर प्रसिध्दी खातीर करतले.
प्रवेशिका सादर करपाचो निमाणो दीस १० ऑक्टोबर २०२५ सांजेची ५ वरां मेरेन आसा. ता. १६ नोव्हेंबर २०२५ दिसा राष्ट्रीय पत्रकारिता दिसा फोटो प्रदर्शन आयोजीत करपात येतले आनी कार्यक्रमात सर्तीच्या जैतवंतांक इनामां भेटयतले.
प्रवेशिकांचेर गोंय राज्य फोटो सर्त आनी प्रदर्शना खातीर प्रवेशिका असो स्पश्ट उल्लेख करचो आनी संचालक, म्हायती आनी प्रसिध्दी खातें, तिसरो माळो, उद्देग भवन, पणजी गोंय हांच्या नाम्यार सादर करच्यो. निमाणे तारखे उपरांत आयिल्ल्या प्रवेशिकांचो विचार जावचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
