दिवाडे उबारतलें सप्तकोटेश्वर देवूळ

भांगरभूंय | प्रतिनिधी

‘कोटीतीर्थ कॉरीडॉर प्रकल्पा’ खाला जातली देवळाची निर्मिती: मुख्यमंत्री

पणजी : पुर्तुगेज राजवटींत राज्यांतलीं १ हजारां परस चड देवळां उध्वस्त जाल्यांत. दिवाडेच्या मोडून उडयिल्ल्या देवळाचे सुवातेर नवें सप्तकोटेश्वर देवूळ उबारतले. कोटीतिर्थ कॉरीडॉर प्रकल्पा खाला १० हजार चौरस मीटर सुवातेर तें बांदतले, अशें मुख्यमंत्री डॉ. प्रमोद सावंत हांणी सांगलें.
मंत्रिमंडळाचे बसकेंत हेर खुबश्या निर्णयां वांगडा कोटीतिर्थ कॉरीडॉर प्रकल्पाक मान्यताय दिली. गोंय साधनसुविधा विकास महामंडळा वतीन (जीएसआयडीसी) हो प्रकल्प निर्माण जातलो. पुराभिलेख खात्या खाला स्थापन केल्ले समितीन दिल्ल्या अहवाला उपरांत सरकारान देवूळ उबारपाचो निर्णय घेतलो. दिवाडेचें देवूळ उध्वस्त जाले उपरांत थळाव्या लोकांनी लिंग नार्व्यां व्हरून ताची स्थापना केल्ली. छत्रपती शिवाजी महाराजान उपरांत सध्याचें सप्तकोटेश्वर देवूळ उबारिल्लें. भाविकांक मूळ सुवातेर कुलदेवतेचें दर्शन घेवप शक्य जावचें म्हूण मूळ सुवातेर देवूळ उबारतले, अशें तांणी मुखार म्हणलें.

लॉजिस्टीक, वेरहावजींग उद्देगांक अर्थीक सवलत
लॉजिस्टीक आनी वेरहावजा संबंदीत उद्देगांक अर्थीक सवलत दिवपाची तरतूद आशिल्ल्या गोवा लॉजिस्टीक आनी वेरहावज येवजणेक मंत्रिमंडळान मान्यताय दिली. भागभांडवला खातीर १० ते १५ टक्के अनुदान, कर्जाच्या व्याजा खातीर अनुदान दितले. तशेंच स्टॅम्प ड्युटी आनी नोंदणी शुल्क माफ करपा वांगडा लॉजिस्टीक मॅनेजमेंट सॉफ्टवेरा खातीर ५० टक्के अनुदान (२ लाख रूपयां मेरेन) दितले, अशी म्हायती उद्देगमंत्री मॉविन गुदिन्हो हांणी दिली.

डम्प मायनींग खातीर टेरीचो सल्लो
डम्प मायनिंग करतना पर्यावरणाचें लुकसाण जावचें न्हय म्हूण सरकार टेरी (द एनर्जी ऍन्ड रिसोर्स इन्स्टीट्यूट) कडल्यान सल्लो घेतलें. डम्प मालाची येरादारी करतना पर्यावरणाची काळजी घेवपा विशीं सल्लागार म्हणून टेरीची मजत घेतले, अशें मुख्यमंत्र्यान म्हणलें.

मुरगांवां जातलें स्ट्रीट सर्कीट रेस
गोवा स्ट्रीट सर्कीट रेस मुरगांवां ३१ ऑक्टोबर ते २ नोव्हेंबर ह्या काळांत जातली. हाचेर १७६ कोटी रूपया खर्च जातलो. तशेंच रेसींग प्रमोशन प्रायव्हेट लिमिटेड कंपनी हांतूंतले १२७ कोटी रूपया खर्च करतले. रेस निमतान रेसींग खातीरच्यो मुळाव्यो सुविधा उबारतले.