भांगरभूंय | प्रतिनिधी
मडगांव : मडगांव रेल्वे स्टेशनावेल्यान रेल्वेंत चडटना गडबडीन एक कर्नाटकाचो प्रवाशी आपलें बॅग स्टेशनाचेरूच विसरलो. रेल्वे सुरक्षा दळान ताका तें परत दिलें. ह्या बॅगांत फकत १० हजार रुपयाच न्हय तर म्हत्वाचीं कागदपत्रां आशिल्लीं.
भटकळ, कर्नाटकचे राजेश मोहन आचारी हे ५ सप्टेंबराक वास्को ते हजरत निजामुद्दीन एक्सप्रेसींत बसतना तांची बॅग फलाट क्रमांक एकाचेरूच उरली. रेल्वे सुरू जाले उपरांत तांकां आपली बॅग रेल्वे स्टेशनारूच उरिल्ल्याचें लषांत आयलें. तांणी रोखडोच १३९ ह्या हॅल्पलायन क्रमांकाचेर संपर्क करून घडिल्ली घडणूक सांगली. हे विशीं म्हायती मेळटांच मडगांव रेल्वे सुरक्षा दळाचे हेड कॉन्स्टेबल पवन सिंग खत्री हे रोखडेच स्टेशनार पावले. तांणी सोद मोहीम सुरू केली आनी कांय वेळांतूच तांकां ती बॅग मेळ्ळी. उपरांत तांणी प्रवाशां कडेन संपर्क केलो. .
जेन्ना राजेश आचारी मडगांवां परत आयले तेन्ना तांणी बॅगेंत आशिल्लें समान तपासलें. तातूंत १० हजार रुपया, १२ हजार रुपयांचे कपडे आनी आधारकार्ड, पॅनकार्ड, ड्रायव्हिंग लायसन्स हीं म्हत्वाचीं कागदपत्रां आशिल्लीं. खंयचीच वस्तू शेणूंक नाशिल्ल्याचें पळोवन तांकां खोस जाली. रेल्वे सुरक्षा दळाच्या ह्या प्रामाणिकपणांक लागून राजेश आचारी हांणी तांचे उपकार मानले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
