भांगरभूंय | प्रतिनिधी
पोरूंचे तुळेन अंदूं 24 टक्क्यांनी दिसून आयलो उणाव
पणजी: नीती आयोगाच्या अहवाला प्रमाण पोरूं वर्सां गोंयांत खाजगी ईव्ही वाहन खरेदी करपाक लोकांनी बरो प्रतिसाद दिल्लो. अशें आसलें तरी अंदूं वर्सा ईव्ही वाहन खरेदींत उणाव जाला. मेळिल्ले म्हायती प्रमाण फाटल्या वर्सा जानेवारी ते ऑगस्ट मजगतीं, 8079 ईव्ही वाहन नोंदणी जाल्ली. अंदूंच्या ह्या आठ म्हयन्यांत 6160 ईव्ही नोंदणी जाल्या. फाटल्या वर्साचे तुळेन अंदूं ईव्ही नोंदणेंत 24 टक्क्यांनी उणाव जाला.
कार्बन उत्सर्जन उणें करपा खातीर सरकारान ईव्ही खरेदी खातीर अनुदान येवजण सुरू केल्या. पूण फाटल्या कांय म्हयन्यांत गोंयांत ईव्ही वाहनां खरेदींत उणाव जायत आसा. ईव्ही वाहनांक विक्री उपरांत सेवा न मेळप वा मेळपाक कळाव जावप, सर्व्हिसिंगे वेळार वाहनांचे भाग मेळपाक कळाव जावप, गोंयांत फावोशें पार्ट उपलब्ध नासप, म्हारग पार्ट, वाहनाच्या बॅटरीची समस्या, उणीं चार्जींग स्टेशनां अशा विवीध कारणांक लागून ईव्ही वाहनां घेवपाची संख्या उणी जायत आसा.
वयल्या काळांत गोंयांत पेत्रोल वाहनांचीच चड विक्री जाल्ल्याचें स्पश्ट जाता. गोंयांत जानेवारी ते ऑगस्ट 2025 मजगतीं 31 हजार 379 पेत्रोल वाहनांची नोंदणी जाल्ली. जाल्यार फाटल्या वर्सा ह्याच पांच म्हयन्याच्या काळांत 32 हजार 553 पेत्रोल वाहनांची नोंदणी जाल्ली. उपरांत पेत्रोल हायब्रीड, डिझॅल, सीएनजी आनी हायब्रीड स्वरुपाच्या ईव्ही गाडयांची नोंदणी जाल्ली. जाल्यार हायब्रीड डिझॅल आनी इथेनॉल इंधन वापरपी वाहनांची सामकी उणी नोंदणी जाल्या.
2023 वर्सा सगल्यांत चड ईव्ही नोंदणी
मेळिल्ले म्हायती प्रमाण गोंयांत 2022 वर्सा 5683 ईव्ही वाहनांची नोंदणी जाल्ली. 2023 वर्सा हातूंत वाड जावन नोंदणी 9482 मेरेन वाडिल्ली. पूण 2024 वर्सा ईव्ही वाहनांची नोंदणी संख्या उणी जावन 9026 जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
