भांगरभूंय | प्रतिनिधी
प्रधानमंत्र्यांच्या वाडदिसा निमतान कल्याणकारी येवजण्यांची जागृताय
पणजी: प्रधानमंत्री नरेंद्र मोदी हांच्या वाडदिसा निमतान गोंयांत 17 सप्टेंबर ते 2 ऑक्टोबर मेरेन ‘सेवा पखवाडा’ कार्यावळ आयोजीत केल्यात. हे कार्यावळींत गोंयांतल्या सगल्या खात्यांच्या विवीध येवजण्यांची म्हायती लोकां मेरेन पावयतले. सेवा पखवाडा कार्यावळींत व्होकल फॉर लोकल हो नारो दितले अशें मुख्यमंत्री डॉ. प्रमोद सावंत हांणी सांगलें.
प्रधानमंत्री नरेंद्र मोदी हांच्या वाडदिसा निमतान गोंयांत 17 सप्टेंबर ते 2 ऑक्टोबर ह्या काळांत सेवा पखवाडा उपक्रम राबयतले. खातें मुखेल्यां कडेन बसका घेतले उपरांत मुख्यमंत्र्यांनी पत्रकार परिशदेंत सेवा पखवाडा कार्यावळीची विस्तारान म्हायती दिली.
पयल्या दिसा 17 सप्टेंबराक ग्रामीण विकास संस्था आनी म्हायती आनी प्रसारण खात्या वतीन कला अकादमींत कार्याळ जातली. हे कार्यावळींत गोंयांतल्या विवीध आपमजत गटांक 63 कोटी रुपया रिणांची मंजुरी पत्रां भेटयतले. दुसरे दिसा 18 वेर खेळां खात्या वतीन फोंडें म्हालांत विवीध कार्यावळी जातल्यो. प्रशासकी सुदारणा आनी भौशीक कागाळ खात्याच्या कचेरेचें उक्तावण जातलें.
वास्को रवींद्र भवनांत 22 वेर नुस्तेमारा विशीं आशिल्ल्यो येवजण्यो आनी अदीक म्हायती दिवपी कार्यावळ जातली. खात्याच्या विवीध येवजण्यांची मंजुरी पत्रां लाभार्थ्यांक भेटयतले.
23 सप्टेंबर दिसा पणजे मिनेझीस ब्रागांझा सभाघरांत समाज कल्याण खात्याच्या येवजण्यांचेर आदारीत कार्यावळ जातली.
24 सप्टेंबर दिसा दिवचले पशूसंवर्धन खात्या वतीन विवीध येवजण्यां विशीं कार्यावळ जातली.
25 सप्टेंबर दिसा पुलीस खात्या वतीन रस्तो सुरक्षा आनी घुंवळे वखदां विरोधी पंगडा वतीन गोंयांत कार्यावळ जातली.
26 सप्टेंबर दिसा गेडा वतीन प्रधानमंत्री सूर्य घर येवजणेचेर आदारीत कार्यावळ जातली.
27 सप्टेंबर दिसा आदिवासी कल्याण खात्या वतीन काणकोणां कार्यावळ जातली.
28 सप्टेंबर दिसा धारबांदोड्यां कृशी खात्या वतीन विवीध कार्यावळी जातल्यो. 29 वेर दिवचले कुशळटाय विकासा खाला कार्यावळ जातली. त्याच दिसा बायलां आनी भुरगीं उदरगत खात्या वतीन कुडचड्यार आनी केप्यां कार्यावळी जातल्यो.
एक ऑक्टोबराक शिक्षण खात्या वतीन पेडण्यां संत सोहिरोबानाथ आंबिये म्हाविद्यालयांत आत्मनिर्भर भारत आनी विकसीत भारत हाचेर डॉक्युमेंटरी दाखयतले. तशेंच ह्या विशयाचेर व्याख्यानाचेंय आयोजन केलां.
खांडोळ्यां सरकारी म्हाविद्यालाच्या हॉस्टेलाचें उक्तावण 2 ऑक्टोबराक जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
