भांगरभूंय | प्रतिनिधी
कोडार- बेतोडकारांची जाली जाहीर सभा
फोंडें : आयआयटीक कायमची सुवात दितले अशें मुख्यमंत्री एके वटेन घोशणा करतनाच, गोंयांत सगलेच कडेन आयआयटीच्या प्रस्तावीत सुवातांक विरोध जावपाक लागला. हालींच वेंचून काडिल्ले बेतोडें – कोडारचे सुवातेकूय आतां विरोध जाता.
कोडारची खडपां आनी बागायती आशिल्ली साडे चवदा लाख चौरस मिटर जमीन सरकारान ताब्यांत घेवपाच्यो हालचाली ताब्यांत केल्यात. ही सुवात कोमुनीदादीची. हे सुवातेर आयआयटीचो प्रकल्प करपाक सरकारान यत्न सुरू केल्यात. मात, हाची सुलूस लागतकच गांवकार तिडकले. तांणी सोमारा जाहीर सभा घेवन आपलो विरोध उक्तायला. बेताळाच्या देवळांत जाल्ले हे बसकेक नागरीक व्हडा संख्येन हजर आशिल्ले.
ग्रामस्थांच्या मता प्रमाण, प्रस्तावीत सुवाते मदली थोडी जमीन ही खडपांची आसा, जाल्यार उरिल्ली लागवडी खाला आसा. थंय नाल्लांचीं, सुपारी आनी हेर पिकाचीं झाडां आसात. कांय वाठारांनी वखदी गुणधर्म आशिल्लीं झाडांय आसात. रानवटी जनावरांय आसात. आयआयटीचो प्रकल्प सुरू जाल्यार झाडां कापतले. हाचो परिणाम पर्यावरणाचेर जातलो. तशेंच रानवटी जनावरांकूय त्रास जातले. हे सुवातेर लोक पीक घेतात तांकां लागवडीचे उदक सोडचें पडटलें, असो भंय लोकांनी उक्तायला. सोमारा जाल्ले बसकेंत लोकांनी विरोध उक्तायला. हे बसकेक परर्यारणमोगीय हजर आशिल्ले.
लोकांच्या मता प्रमाण, ही सुवात मेजचे पयलीं सरकारान लोकांक विस्वासांत घेवपाक जाय आशिल्ले. मात अशें जावंक ना, म्हणून ते तिडकल्यात. पर्यावरणाचें लुकसाण करून हांगा कसलेच तरेचो प्रकल्प जावपाक दिवचे नात, अशें लोकांनी सांगलें.
हे संबंदी व्यापक जनजागृताय करतले. सगल्या लोकांच्यो सयो आशिल्लें निवेदन तयार करतले. तें सरकाराच्या विवीध खात्यांक दितले. निवेदना उपरांतूय सरकारान हो प्रकल्प मुखार व्हरपाचो यत्न केल्यार व्हड आंदोलन उबारपाची शिटकावणी लोकांनी बसकेंत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
