भांगरभूंय | प्रतिनिधी
अफगाणिस्तानाचो पंगड हो हे आशिया करंड सर्तींतल्या म्हत्वाच्या पंगडांतलो एक आसा अशें म्हणपाक जाता. हालिंसाराक जाल्ले तिरंगी माळेचे फायनलींत अफगाणिस्तानाक पाकिस्ताना कडल्यान हार घेवची पडिल्ली. पूण, तांकां यूएईंत खेळपाचो अणभव आसा आनी ह्या पंगडां मुखार हॉंगकॉंग हो नवोदीत पंगड लेगीत आसा, ताच्या आड तो आपले सगले डावपेंच तपासपाक शकतात आनी व्हड जैत मेळोवन सर्तीची सुरवात करपाक शकता.
दुसरे वटेन हॉंगकॉंग एक नवो पंगड आसा. ताका व्हड पंगडां आड खेळपाचो अणभव ना. पूण, ह्या पंगडाक उणो लेखपाची चूक खंयच्याय पंगडाक म्हारग पडुये. कारण नवोदीत पंगड व्हड सर्तींनी बळिश्ट पंगडाक धपको दिवपाक शकतात. अशें आयसीसीच्या सर्तींनी साबार खेपे घडलां.
अफगाणिस्तान हालींच पाकिस्ताना आड तिरंगी माळ खेळून आयला. फायलनींत ताका हार घेवची पडली आसली तरी ताणें पूर्ण सर्तींत उत्कृश्ट प्रदर्शन केलां. ताणें सातत्यान आपल्या प्रदर्शनांत सुदारणां केल्या. पाकिस्तानाक ताणें साबार खेपे हारयला. ताका लागून सर्तींत वांटो घेवपी हेर पंगडांक लेगीत ताच्या पसून सादूर रावपाची गरज आसा.
दुसरे वटेन हॉंगकॉंग पंगडा हालिंसाराक चड मॅची खेळपाक मेळूंक नात. पूण, आशिया करंड सर्तींत तो बळिश्ट पंगडांक धपके दिवपाक शकता. फाटल्यो पांचांतल्यो तीन मॅची जिखल्यात. ताची निमाणी मॅच आशिया पॅसिफीक चॅम्पियन्स ट्रॉफीची फायनल आशिल्ली. फायनलींत ताका मलेशिया आड हार घेवची पडिल्ली.
अफगाणिस्तान आनी हॉंगकॉंग ह्या पंगडां मदीं अजून मेरेन पांच मॅची जाल्यात. तातूंतल्यो तीन मॅची अफगाणिस्तानान जिखल्यात, जाल्यार दोन मॅचींनी हॉंगकॉंगान जैत जोडलां.
बाबर हयात आनी अंशुमान रथ हांचेर हॉंगकॉंगाक जलद रितीन सुरवात करून दिवपाची जापसालदारकी आसतली. मदले फळयेंत अणभवी किंचित शाह आसा. ताका मार्टिन कोएत्जी आनी जीशान अली हांच्या कडल्यान बरी साथ मेळपाची शक्यताय आसा. बॉलिंग विभागांत यासिम मुर्तजा वांगडा निजाकत खान आनी अहसान खान हे आसात. हे तिगूय स्पिनर आसात, जाल्यार फास्ट बॉलर म्हणून मोहम्मद वाहिद हो एकलोच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
