भांगरभूंय | प्रतिनिधी
दिगंबर कामत हांची कंत्राटदाराक 30 सप्टेंबर मेरेन मुजत
दाबोळी चौक ते एमईएस चौक मेरेनच्या सर्वीस रस्त्याची पळोवणी
भांगरभूंय । प्रतिनिधी
वास्को : दाबोळी चौक ते एमईएस चौक मेरेनच्या सर्वीस रस्त्याचे दुरुस्तीचें काम हातांत घेवन, वाहनचालकांक बरो दोनूय वटांतलो सर्वीस रस्तो 30 सप्टेंबरा मेरेन दियात, ना जल्यार उड्डाण पुलाचें काम बंद करतले, अशी शिटकावणी भौशीक बांदकाम मंत्री दिगंबर कामत हांणी सोमारा दिली.
कंत्राटदाराचे चुकीक लागून सरकाराक गाळी खावच्यो पडटात, हे खातीर मंत्री कामत हांणी तिडक उक्तायली. गोंयांत खंयूय पुलाचें वा हेर काम सुरू करचे आदीं थंय सर्वीस रस्त्याची पयली वेवस्था करपाक जाय, हाचेर लक्ष दियात अशें निर्देश तांणी आपल्या खात्याच्या अधिकाऱ्यांक दिले. मंत्री कामत हांणी दाबोळीचे आमदार आनी येरादारी मंत्री मॉवीन गुदिन्हो, दक्षीण गोंय जिल्हो पंचायत अध्यक्ष अनिता थोरात तशेंच भौशीक बांदकाम खात्याचे अभियंते, कंत्राट कंपनीचे अभियंते, अधिकारी हांचे सयत दाबोळी चौक ते एमईएस चौक मेरेनच्या रस्त्याची पळोवणी केली. ह्या वेळार मंत्री कामत हांणी मंत्री गुदिन्हो, अभियंते हांचे कडेन चर्चा केली. लोकांक बरो सर्वीस रस्तो मेळपाक जाय, अशें तांणी स्पश्ट केलें. दाबोळी चौक ते एमईएस चौक मेरेनचो दोनूय वटांतलो सर्वीस रस्तो पुराय जाले उपरांत ते संबंदिची येरादारी पुलीस उपअधिक्षकाक म्हायती दियात. ते त्या रस्त्याची पळोवणी करून ते विशींचो अहवाल आपल्याक दितले. थंय वेगवेगळे सुचोवणी तकटे लावपा खातीर 10 दिसांची मुजत दिल्या, अशें मंत्री कामत हांणी सांगलें. आपूण अचकीत भेट दिवन पळोवणी करतलों, अशेंय तांणी सांगलें.
हांवूय इंजिनियर : दिगंबर कामत
थंयच्या म्हामार्गाची आवतिकाय पळोवन मंत्री दिगंबर कामत हांणी तिडक उक्तायली आनी दुरुस्तीचें काम बेगिनात बेगीन हातांत घेवपाक सांगलें. पावसाक लागून कामांत आडखळ येता अशें अभियंत्यांनी सांगताच, आपणे लेगीत इंजिनियरींगचें शिक्षण घेतलां, अशें कामत हांणी सांगलें. आतां तंत्रज्ञानाक लागून पावसांत लेगीत रस्त्याचें काम करपाक मेळटा, अशें तांणी स्पश्ट केलें. मजगतीं, कामत हे रस्त्याची पळोवणी करतले हे खळटाच कंत्राटदाराच्या अधिकाऱ्यांनी सकाळ सावन फोंडकुलां पुरोवपा खातीर धांवपळ सुरू केल्ली. तशेंच रस्त्याचेर टँकरांतल्यान उदक मारिल्लें. दोळ्यांक उदक लावपाचो यत्न त्या अधिकाऱ्यांनी केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
