भांगरभूंय | प्रतिनिधी
मडगांवां कागाळ, कारवायेचें पुलिशेचें आस्वासन
भांगरभूंय । प्रतिनिधी
मडगांव : ईद- ए- मिलाद निमतान गोंयभरांत मुस्लीम भावां वतीन जुलूस काडिल्लो. ह्या जुलूसाच्या व्हिडियोचेर कांय जाणांनी धर्मीक भावनां दुखवपा सारकें हरकत घेवपी विधान केलां. ह्या प्रकरणांत सोमारा तन्झीम इ आला हजरत इमाम अहमत रझा संस्थे वतीन मडगांव पुलीस स्टेशनाचेर कागाळ नोंद केल्या. मडगांवच्या दक्षीण गोंय जिल्हो पुलीस मुख्यालया कडेन सोमारा परतून एकदां मडगांव आनी भोंवतणच्या वाठारांतले मुस्लीम भाव एकठांय जाले.
गोंयांत मुस्लीम भावांनी ईद- ए- मिलाद मनयतना मिरवणुको काडल्यो. ह्या जुलूसाच्या एका व्हिडियोंत जुझे इनासियो रॉड्रिग्स हाचे सयत राज मॅक, आयुर्वेद गोवा, जगदीश नायक, ऋषिकेश एम. नांवाच्या सोशल मिडिया वयल्या अकावंटाचेर प्रेशीत मोहम्मद पैगंबर हांचे संबंदांत हरकत घेवपा सारकी टिपणी केल्या. ह्या व्यक्तींचेर गुन्यांव नोंद करून तांचेर कारवाय करची, अशी मागणी तन्झीम इ ला हजरत इमाम अहमत रझा संस्थे वतीन केल्या. मुस्लीम भावांनी ह्या प्रकारा संबंदांत दक्षीण गोंय जिल्हो पुलीस अधिक्षक टिकमसिंग वर्मा हांची भेट घेवन कारवायेची मागणी केली.
आंदोलन करप्यांनी सांगलें, मुस्लीम भाव हे आपल्या कुटुंबा परस चड देवाक मानतात. त्या देवा संबंदांत चुकीचीं उतरां आयकून घेवचे नात. पैगंबरा संबंदांत हरकत घे सारकें विधान केल्ल्यान जुझे इनासियो रड्रिग्स, राज मॅक, आयुर्वेद गोवा, जगदीश नायक, ऋषिकेश एम. हांचेर कारवाय करची. वास्को पुलिसांनी राज मॅक हाका ह्या प्रकरणांत अटक केल्या. तशेंच हेर दुबावितांक लेगीत सोदून कारवाय करची. जुझे इनासियो रॉड्रिग्स ही व्यक्ती लंडनाक रावता. ताका थंयच्यान ताब्यांत घेवन धर्मीक भावना दुखयल्यार कारवाय जाता, हें पुलिसांनी दाखोवन दिवचें. तेचवरी मुख्यमंत्र्यान लेगीत हातूंत लक्ष घालचें, अशी मागणी आंदोलन करप्यांनी केल्या.
आतां मेरेन एकल्याक अटक : पुलीस अधिक्षक
ईद निमतान काडिल्ले मिरवणुकेचे व्हिडियोचेर कांय जाणांनी हरकत घेवपा सारकीं टिपणी केल्या. ह्या प्रकरणांत गोंयांतल्या विवीध पुलीस स्टेशनाचेर कागाळी आयल्यात. वास्को पुलिसांनी ह्या प्रकरणांत राज मॅक उर्फ भासुराज मकपूर हाका अटक केल्या. ताका तीन दिसांची पुलीस कोठडी दिल्या. कायद्या प्रमाण जी कारवाय आसा ती करतले. हेरांचेरूय कारवाय करतले, अशें पुलीस अधिक्षक टिकमसिंग वर्मा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
