भांगरभूंय | प्रतिनिधी
मुख्यमंत्री : भौशीक येरादारी वेवस्था सुदरतले
भांगरभूंय । प्रतिनिधी
सांखळी : गोंय सरकारान खाजगी बसकारां खातीर हाडिल्ली म्हजी बस येवजण बसकारां वांगडाच लोकांक लेगीत फायद्याची आसा. हे येवजणेचो लाव बसकारांनी घेतलो जाल्यार गोंयांतली भौशीक येरादारी वेवस्था व्हड प्रमाणांत सुदरपाक मजत जातली. स्वताची गाडी घेवन भोंवचे परस बशींतल्यान प्रवास करपाचो लोकांक बरो पर्याय मेळटलो. अपघात आनी येरादारीची कोंयडी पसून सुटका मेळटली. हे खातीर सगल्या बसकारांनी सकारात्मक विचार दवरचो, असो उलो मुख्यमंत्री डॉ. प्रमोद सावंत हांणी मारलो.
कदंब म्हामंडळा वतीन सांखळी मतदारसंघांतल्या ग्रामीण वाठारांतल्यान पणजे वचपा खातीर चार इलेक्ट्रीक बशी सुरू केल्यात. तांचें लोकार्पण मुख्यमंत्र्यां हस्तुकीं जालें. ह्या वेळार ते उलयताले. तांचे वंगडा कदंब म्हामंडळाचे अध्यक्ष आमदार गणेश गांवकार, म्हामंडळाचे वेवस्थापकी संचालक रोहन कासकार, सरवेवस्थापक पेडणेंकार, सुदर जल्मी आनी हेर मानेस्त हाजीर आशिल्ले. पणजे वरींच गोंयांतल्या सगल्या गांवगिऱ्या वाठारांनी लोकांक भौशाक येरादारी वेवस्था सोयीची जावची हे खातीर इलेक्ट्रीक बशी सुरू करपाचो विचार आसा. ताचोच भाग म्हूण सांखळेच्या गांवगिऱ्या वाठारांतल्यान लोकां खातीर कदंबाच्यो चार बशी सुरू केल्यात. ताचो योग्य लाव लोकांनी घेवचो, असो उलो मुख्यमंत्र्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
