भांगरभूंय | प्रतिनिधी
जिवीतहानी ना, पूण मालमत्तेचें लाखांचें लुकसाण
भांगरभूंय । प्रतिनिधी
मडगांव : तळावले घराक उजो लागपाची घडणूक आयतारा सांजे वेळार घडली. तातूंत दोन सिलिंडरांचो स्फोट जालो, पूण कोणाक दुखापत जावंक ना. मडगांव उजो पालोवपी दळान उज्याचेर नियंत्रण मेळयलें, तशेंच घरांतले दोन सिलिंडर भायर काडले.
तळावले प्रभाग नं. 1 हातूंतल्या प्रकाश परवार हाच्या घराक सांजेच्या 7.30 वरांच्या सुमाराक उजो लागलो. मातयेचें नळ्यांचें ते घर. प्रकाशाचो भाव ह्या घराच्या कुशीक आशिल्ल्या दुसऱ्या घरांत रावता. घराचे फाटले वटेन उदक तापोवपा खातीर चुलींत उजो केल्लो. घरांतले मनीस भायर आसतनाच तो उजो सगले कडेन पातळ्ळो आनी घराच्या लांकडी वाश्यांक लागलो. उजो लागपाची घडणूक घडली तेन्ना प्रकाशा सयत ताची घरकान्न आनी भुरगीं घरांत नाशिल्लीं. उज्यान पेट घेतिल्ल्यान रांदचे कुडींत आशिल्ल्या दोन भरिल्ल्या सिलिंडरांचो स्फोट जालो. मजगतीं, मडगांव उजो पालोवपी दळाक हाची म्हायती दिल्ली. जवानांनी येवन उज्याचेर नियंत्रण मेळयलें आनी घरांतलो आनीक एक भरिल्लो तशेंच एक रितो गॅस सिलिंडर भायर काडलो.
मडगाव उजो पालोवपी दळाचे अधिकारी गील सुझा हांणी सांगलें, तळावले उज्याचे घडणुके विशीं पणजी मुख्यालयाक कॉल गेल्लो. थंय सुरावले उजो लागिल्ल्याचें सांगलें. ताका लागून बंब धाडिल्लो. मात कांय वेळान तळावलेच्या प्रभाग नं. 1 तले एके व्यक्तीन थंय उजो लागिल्ल्याचें सांगताच दुसरो बंब घेवन घडणुकेचे सुवातेर पावले. ते मेरेन उज्यान पेट घेतिल्लो. पुराय घर उज्यान लासून गेलां. लाखांनी रुपयांचें लुकसाण जाल्ल्याचो मुळावो अदमास आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
