भांगरभूंय | प्रतिनिधी
पेडणें: विवीध उपक्रम चालीक लावपा वांगडांच आपापल्या गांवांतल्यो जमनी सुरक्षीत दवरपाक भौशीक गणेशोत्सव मंडळांनी फुडाकार घेवचो. तशे तरेची जागृताय करची. सरकारान राज्यांतल्यो जमनी सुरक्षीत दवरपा खातीर नवो कायदो करचो, अशें आदले केंद्रीय कायदो मंत्री रमाकांत खलप हांणी सांगलें. मोरजी गणेशोत्सव मंडळाच्या सोर्तींचो निकाल, भोवमान कार्यावळींत मुखेल सोयरो ह्या नात्यान उलयतना केलें. ह्या वेळार विवीध मानेस्त हजर आशिल्ले.
खलप हांणी सांगलें, गोंयांत व्हडा प्रमाणांत बिगर गोंयकार वाडल्यात. भायले व्हडा प्रमाणांत जमनी विकत्यो घेतात. तातूंत शेतजमनी, दोंगर, मळे, रानां हांचो आसपाव आसा. फुडल्या कांय वर्सांनी हें आमकां खूब मारक थारतलें , अशेंय खलप हांणी सांगलें.
पुराय जनतेन एकठांय येवन आपापल्यो जमनी सुरक्षीत दवरपाचो आनी त्यो बिगर गोंयकारांक ना विकपाचो विचार करपाक जाय. सरकारान नवो कायदो आनी गोंयचे जमनी खातीर सुरक्षा दिवपाचे नदरेन काम करचें. हाका लागून आपलेंय सहकार्य सरकाराक मेळटलें अशें श्री. खलप हांणी स्पश्ट सांगलें.
मोरजेचे आदले सरपंच पवन मोरजे हांणी सांगलें, मोरजे बिगर गोंयकार वाडल्यात. फुडाराक मोरजे पंचायतीचेरूय तांचें वर्चस्व आसतलें.
मांद्रेंचे आदले सरपंच बाळा उर्फ प्रशांत नायक हांणी सांगलें, आयज जमनी विकत घेतात. फुडाराक पंचायतीचेरूय बिगर गोंयकार पंच, सरपंच म्हणून आपलें राज्य निर्माण करतले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
