भांगरभूंय | प्रतिनिधी
काणकोण: सरकारान कोमुनिदाद आनी सरकारी जमिनींतल्या घरांक संरक्षण दिवपाचें जाहीर केलां. तशेंच जमीन धनयांचे (भाटकारांच्या) जमनींत जांचीं घरां असात आनी जांकां आजून मेरेन मुंडकार वा कुळ कायद्या प्रमाण जमनीचो हक्क मेळूंक ना तांकां संरक्षण दिवचें अशा आशयाचें निवेदन काणकोण पालिकेचे नगरसेवक शुभम कोमरपंत हांणी मुख्यमंत्री डॉ. प्रमोद सावंत हांकां सादर केलां.
काणकोण तशेंच गोंयच्या विवीध वाठारांतल्या दर्यादेगां लागसार आशिल्ल्या भाटकारांच्या जमनींत हजारांनी ‘कुळां’चीं घरां आशिल्ल्यान तांकां कुळ कायद्या प्रमाण जमनी दिवपाक भाटकार फाटीं फुडें जातात. तशेंच दर्यादेग वाठारांतल्या जमनींक भांगराचें मोल गाविल्ल्यान कितल्याशाच भाटकारांनी कुळाची परवानगी घेनासतनाच जमनी देशी आनी विदेशी नागरिकांक विकल्यात. ज्यो जमनी विकल्यात त्या जमनींचे नवे धनी कुळांक त्रास दितात वा कुळांचीं घरां मोडून उडोवपाचेय प्रकार घडल्यात, अशें शुभम कोमरपंत हांणी सांगलें.
१९७२ उपरांत जांणी भाटकारांच्या जमनींत घरां बांदल्यांत, तांकां संरक्षण दिवचें अशीय मागणी कोमरपंत हांणी डॉ.सावंत हांचे कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
