भांगरभूंय | प्रतिनिधी
कुटुंबान केले भलायकी वेवस्थेचेर प्रस्न
पणजीः काणकोणच्या समाजीक मळा वयलें एक व्यक्तीमत्व नंदा सतरकार (आगस- माशें) हांकां सोरोप चाबिल्ल्यान मरण आयिल्ल्याचें तांच्या घरच्यांनी म्हणलां. तांकां ज्या भलायकी केंद्रांत व्हेल्ले थंय ताच्या पांयांक कोणा चाबलो हें समजूंक ना. हाका लागून ताका ‘अॅण्टीवेनम’ वखद दिवंक ना. निमाणी परिस्थिती हाता भायर गेल्ल्यान तांकां गोमेकाँत व्हेले. थंय तांकां विख देंवपाक इंजेक्शन दिलें मात, तो मेरेन बरोच उशीर जाल्लो. निमाणें ३८ वरांचें तांचें मरणा कडेन चलिल्लें झूज अपेशी थारलें. हे सगले घडणुकेक लागून तांच्या कुटुंबान भलायकी वेवस्थेच्या निश्काळजीपणाचेर प्रस्न केला.
नंदा सतरकार हांची सून नेहा हांणी फेसबुकार एक पोस्ट केला. तातूंत तांणी भलायकी यंत्रणेच्या निश्काळजीपणाचेर तिडक उक्तायल्या. तिणें म्हणलां, ‘‘२ सप्टेंबर २०२५ दिसा आमच्या कुटुंबाचो आदार आमचे लाडके बाबा नंदा सातरकार हांकां पीएचसी काणकोण, दक्षीण गोंय डिस्ट्रिक्ट हॉस्पिटल आनी जीएमसीच्या निश्काळजीपणाक लागून आमी वगडायले.’
‘३० ऑगस्ट २०२५ दिसा आंगणांत कितें तर चाबिल्ल्यान बाबांच्या पायाक सूज आयली आनी तांचो पांय दुखपाक लागलो. तांकां दिसलें मूय चाबल्या आसतली म्हूण. मात तांची सूज आनी दुखणें वाडतूच गेलें. वट्ट दोन वरांनी आमी तांकां पीएचसी काणकोणा व्हेलें. तपासणी करून विखारी लक्षणां दिसुनय तांणी फकत इतलेंच सांगलें, ‘कोण चाबला हें वळखपाक जायना. हाका लागून आमी तांकां ‘टी वेनम’ (वीख देंवपाचें वखद) दिवपाक शकनात.’
उपरांत तांकां दक्षीण गोंय डिस्ट्रिक्ट हॉस्पिटलाक व्हरपाक सांगलें. मात तेन्ना हे घडणुकेक चार वरां जावन गेल्लीं. थंय तांकां दाखल केलें. तरी तांकां थंय ‘टी वेनम’ दिवंक ना. फकत दर ४ वरांनी रगत गोठेवपाची तपासणी केली, जी सदां सारकीच येताली. वट्ट १८ वरां ‘टी वेनम’ दिलें. पूण तो मेरेन परिस्थिती इबाडली. मुतूंक बंद जालें, लक्षणां गंभीर जायत गेलीं, तरी कांयच करूंक ना, अशें नेहा हांणी पोस्टांत नमूद केलां. ‘उपरांत आमी उबगून बाबांक जिएमसींत व्हेलें. थंय तांकां ‘टी वेनम’ दिलें. मात तो मेरेन ३८ वरां जावन गेल्लीं. दोन दिसांनी तांकां मरण आयलें. जिएमसींत सुरवातेक उपचार बेगोबेग जाले. मात कनीश्ठ दोतोरांचो बेफिकीर दृश्टीकोन आनी गंभीर लक्षणां कडेन केल्ले आडनदरेक लागून बाबांक मरण आयलें.’’ अशें नेहा हांणी पोस्टांत मुखार म्हणलां.
‘आयज हांव त्या सगल्या भलायकी कर्मचार्यांक विचारतां, जर तुमच्या घरांतल्या कोणायकूय अशें कोणूय चाबिल्लें, जाल्यार तुमी आडनदर करपाचे? वैजकी शिक्षण घेतना तुमकां शिकोवंक ना? कोण चाबला हें कळूंक ना जाल्यार ताचो धोको चड आसता आनी ताचेर बेगोबेग उपचार गरजेचे म्हूण? फकत ‘क्लॉटिंग टेस्ट’ करप हें तुमचें कर्तव्य? पायाची सूज आनी मुतूंक जावप ना, हीं गंभीर लक्षणां नाशिल्लीं? अशे प्रस्न तिणें फेसबुकार मांडल्यात.
‘‘आमच्या मोगाळ बाबाक आमी तुमकां लागून वगडायलो. कांय दिसां आदीं आमी तांचे वांगडा चवथ मनयली आनी आयज तांच्या वचपाचें दुख्ख करतात. हो धक्को आमी केन्नाच विसरपाक शकचीं नात. जर तुमकां जीव वाटावपाचें कर्तव्य करपाक जायना, जाल्यार स्वताक भलायकी रक्षक म्हणू नाका. तुमच्या उसरां केल्ल्या उपचारांक लागून आनी निश्काळजीपणाक लागून आमी आमच्या बाबांक वगडायलो.’’ अश्या शब्दां नेहा हांणी तिडक उक्तायल्या.
नंदा सतरकार हे काणकोणच्या निराकार शिक्षण संस्थेचे खजीनदार. तांच्या वचपान सगल्यांकूच धक्को बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
