भांगरभूंय | प्रतिनिधी
आमी ह्या संवसारांत येत सावन आमचीं घरचीं खास करून घरांतलीं व्हडलीं मनशां आमकां पावला कणकणी राखीत आसतात. व्हड जातकच आमी जिविताच्या उजू मार्गार चलचे म्हूण आमकां संवसारांतल्यो ज्यो ज्यो गजाली संपर्कांत येता ते विशीं तीं आमकां जाण दीत आसतात. तांचे विशींची शिकवण दिता. फुडारांत आमी ते ते वस्तूं कडेन त्या त्या मनशां लागीं ते ते परिस्थितींत कशें वागचें हाची देख दितात. तेच आमचेर संस्कार आसतात. जिवितांत बरे मार्गार व्हरपाक, दुसऱ्यांक आमची मजत जावपाक, आदार जावपाक त्यो गजाली आमकां आदार दितात. जाणटेल्यांचे सांगणेन आमी जर वागलीं जाल्यार आमच्या जिवितांत सोंपेपणान संकश्टां येनात. जिवितांतली खोस आमी भोगूंक पावतात. देवा धनया कडल्यान ’पुण्य’ नांवाची गजाल आमच्या वांट्याक येता. आनी शेवटाक भावंडांनो जिविताची मोख तरी कितें आसता? तर आमचें जिवीत बरे तरेन जियेतना हेरांकय जियेवपाक आमी आदार दिवप. खरें आसा न्हय म्हजें? म्हळ्यार तुमकांय घरांत हेंच सांगता आसतलीं न्हय तुमचीं जाण्टेलीं? तर भावंडांनो, तुमकां आयज हांव अशीच शिकवण दिवपी काणी सांगतां हां….
एका गांवांत एका जाण्टेल्याचें कुटूंब रावतालें. कुटुंबांत तीग पूत आशिल्ले. तिगूय आपले परीन आनी बापायच्या संस्कारांनी आपलो संवसार बरे तरेन चलयताले.
कांय काळा उपरांत तांचो बापूय दुयेंत पडलो. जाण्टे पिरायेक लागून त्या दुयेंसांतल्यान बरो जावपाचीं चिन्नां दिसनाशिल्लीं. देखून त्या जाणटेल्यान आपले संपत्तीची वांटणी करपाचें येवजिलें. ताणें सगळे समान वांट्यान पुतांक दिलें. मात ताच्या गळ्यांत एक भांगराची बरी मोटी सरपळी आशिल्ली ती ताच्या जाण्टेल्यां कडल्यान परंपरेन ताचे कडेन सांबाळपाक पाविल्ली. ताणें तिची तेच तरेन जतनाय घेवन सांबाळ केल्लो. ती आतां फुडारांत कोणा कडेन दिवची हो ताका प्रस्न पडिल्लो. देखून ताणें एक युक्त काडली. ताणें तिगाय पुतांक आपोवन जो आपणाक आठ दिसां भितर तांणी केल्ल्या बऱ्या कामाची खबर दितलो, ताका ती फावो जातली अशें सांगलें, आनी…
तिगूय पूत बापायची सांगणी आयकून भायर सरले. आठ दिसांनी बापायन तांकां विचारलें, तेन्ना व्हडल्या पुतान नमळायेन सांगलें ‘‘बाबा, ह्या आठ दिसांत म्हजे कडल्यान बरें काम घडलां तें म्हळ्यार चार दीस पयलीं हांव तळयेर न्हांवपाक गेल्लों. थंय आमची शेजान आपल्या धाकटुल्या पुताक तळयेच्या धडेर दवरून कपडे धुताली. तेन्ना तिचो धाकटुलो केन्ना काय तळयेंत पडलो आनी बुचकळ्ळो. हांवें तें पळयना फुडें तळयेंत उडी मारली आनी ताका वाचयलो. तिणें म्हजे खूब उपकार मानले. हांव थंय पावूंक नाशिल्लो जाल्यार…?
व्हडल्या पुताची खबर आयकून बापायन खोशयेन ताका म्हळें बरें केलें तुवें. असोच दुसऱ्यांक उपेगी पड. उपरांत ताणें दुसऱ्या पुताक विचारलें. ते वेळार मदल्या पुतान सांगलें ‘‘बाबा आमच्या ऑफिसांतलो एक कर्मचारी स म्हयन्यां खातीर प्रशिक्षणा निमतान भायल्या गांवांत गेला. घरांत जाण्टी आवय आसा, देखून ताणें घरांतल्यो भांगराच्यो वस्ती म्हजे कडेन सुरक्षीतपणान दवरूंक दिल्यात. हांवें ताका ह्या वस्तींची वळेरी करून तो येतकच हांव ताका त्यो सुरक्षीत दितलो अशें बरोवन दिलां. हाचे वयल्यान ताचो म्हजो वयलो विस्वास वाडटलो न्हय बाबा’’.
मदल्या पुताचेंय आयकून ताणें ‘हां बरें केलें’ अशें म्हणलें आनी धाकल्या पुताक विचारलें. धाकल्या पुतान सांगलें ‘‘बाबा, तुमकां खबर आसाच, वाड्यावयलो तो परधर्मी मुश्ताक म्हज्या धंद्यावेल्यान म्हजो कितलो दुस्वास करता तो. हांव म्हज्या धंद्यांत वयर सरता तें ताच्यान पळोवं नजो. तुमी जाणांत, एकदां ताणें म्हज्या दुकानांत रातच्या वेळार उजो घालपाचो यत्न केल्लो. म्हज्या कामगाराचे शिटूकसाणेक लागून म्हाका लुकसाण जावंक पावलें ना. आनीक एकदां ताणें म्हाका मारपाक गूंड धाडिल्ले. सोऱ्याचे घुंवळेंत तांच्या उलोवपांतल्यान म्हाका तें कळ्ळें. ताची काकुळट करपाची ना अशे तरेन तो वागता. चार पांच दीस पयलीं हांव रातच्या वेळार घरा येतना तो रस्त्यार स्कूटरी वयल्यान पडिल्लो दिसलो. तेन्ना सगळें विसरून हांवें ताका उपचारा खातीर हॉस्पिटलांत व्हेलो. ताची हांवें काळजी घेतली, ताका रगत दिलें. आतां तो बरो जावन घरा गेला आनी आपली चूक कळिल्ल्यान दोन फावट ताणें आपल्या पुताक म्हजी चूक मागूंक धाडला. तो म्हजे कडेन वायट वागलो म्हूण हांवें ताचो सूड घेतलो ना. मनीसपणाचे नदरेंतल्यान ताका साल्वार केलो.
ताची खबर आयकून बापूय खोशी जालो. बापायन म्हळें ‘‘ बाबा बरें केलें तुवें. मनशान उज्यांत पॅत्रॉल रकोवन केन्नाच तो वाडोवचो न्हय. दुस्वासाचेर मायेमोगान जैत जोडचें. दुस्मानाक तुवें मनीस मानून संकश्टा वेळार ताका पावुंकूच जाय. तुवें ताचें मन आनी काळीज जोडलें, हे खातीर म्हाका तुजी लक्तुबाय दिसता आनी हे खातीर तुज्या ह्या सभावाक लागून हांव तुका ही सरपळीं दितां. तूं तिचो बरो सांबाळ करतलो. अशें म्हणून ताणें गळ्यांतली सरपळी काडून ताच्या हातांत दिली आनी तिगांकूय एकवठान रावपाक सांगलें. तिगांय पुतांनी खोशयेन बापायक वेंगायलो.
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
