भांगरभूंय | प्रतिनिधी
प्रदीप लवंदे हे कोंकणी भाशीक चळवळींतल्यान घडिल्लें व्यक्तिमत्त्व. तांचे बापूय स. बाप्पा लवंदे हे गोंयांतले कोंकणी चळवळीचे तशेंच समाजीक आनी राजकी अस्मितायेचे पुरस्कर्ते आशिल्ले. मुक्त गोंयात राजकी, भाशीक, भुगोलीक अस्मिताय अबाधीत उरची ही विचारधारा घेवन लवंदे हांचे कुटूंब तन मन धनान वावुरलें. ही समाजीक बांदिलकी आनी भान दवरून वावुरपी प्रदीप लवंदे हे संघटक कार्यकर्ते आनी उपरांत लेखक म्हणून कोंकणीच्या मळार वावुरतात. साहित्य हें प्रदीप बाब हांच्या जिविताचें बाय प्रोडक्ट.
प्रदीप लवंदे हे अणभव गांठीक मारून जिविताचेर भाश्य करतात. ताचेंच एक रूप म्हळ्यार उतरालय हो वर्णनात्मक निबंद झेलो. संजना पब्लिकेशन्स हे प्रकाशन संस्थेन प्रकाशीत केला. ह्या पुस्तकाक समिक्षक प्राचार्य डॉक्टर भूषण भावे हांची विशयनिश्ट प्रस्थावना लाबल्या तर कलानंद कामत बांबोळकार हांचे सूचक मुखचित्र लाबलां. प्रदीप लवंदे हाणी हें पुस्तक कोंकणीचे म्हान झुजारी साहित्यीक पुंडलीक नायक हांकां ओपलां. हाचे वेल्यान संघटन आनी सेवा हो प्रदीप बाब ध्यास घेवन जगतात हें प्रतीक रूपान दाखयतात. प्रदीप लवंदे हांचें कुटूंब वेपारी पूण हिशोबी, काटूक वृत्तींतल्यान तें केन्नाच वावुरलेंनात. देखून तांचे समाजीक जिणेक प्रामाणीक कश्टान जोडिल्ले धन आनी लोक संपत्तीची गुणात्मक जोड लाबल्या. लोकसंचय करतना लोकां खातीर हात उखलून दिवप आनी उक्त्या मनान दिवप ही दानत तांच्या उतरालयांत दिसता.
उदारमतवाद हो प्रदीप लवंदे हाचो विचार तांचे प्रादेशीक अस्मितायेक धरून येता. आपले साहित्यीक भुमिकेक प्रामाणीक रावून ते प्रासंगीक लेखन करीत आयल्यात, देखून आपल्या लेखांच्या दर्जा विशीं आनी साहित्यीक गुणवत्ते विशींचो तांकां हुस्को आनी तिश्टतूय दिसना. तो ते समिक्षकांचेर सोडून दितात आनी मेकळे पणान मानूनूय घेतात. प्रासंगिकताय हो तांच्या लेखांचो गूण.वर्तमान पत्राची गरज वळखून ही विशय निश्टताताय पन्नास निबंदानी व्यक्त जाता.विशय आटोवन सांगपाची कळाशी सादपाचो यत्न ह्या निबंदांनी दिसतात. ते खातीर मर्यादाय दिसतात. प्रवास हो तांच्या निबंदांचो गाबो. हो प्रवास विचारांचो, चिंतन- मननाचो आनी विशयनिश्ट वाचनाचोय आसता. संदर्भांची जोड तांच्या निबंद साहित्यांत येता ती ह्या प्रवासा खातीर. वाचपी प्रदीप बाब लेखक म्हणून परिवर्तीत जाल्लो दिश्टी पडटा ते खातीर तांचें उतरालय अणभव समृद्ध जाल्लें दिश्टी पडटा.चिंतन शील, विनोदी,वास्तववादी, प्रासंगीक, राजकी, सामाजीक, सांस्कृतीक संदर्भांतले निबंद ह्या झेल्यांत वाचपाक मेळटात. ह्या निबंदांचें एक खाशेलेपण म्हणल्यार ते अपयश मांडिनात आनी ते श्रमजिवी कश्टी समादानी लोकांक वाचल्या उपरांत थाकाय दितात. जशे भक्तांक प्रार्थना थळांचेर मेळपाक आदार जाता तशें वाचप्यांक उतरालयांत वचून मेळटा.
प्रकाश वजरीकार
9923245603
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
