भांगरभूंय | प्रतिनिधी
भारताच्या दादल्यांच्या हॉकी पंगडान आशिया करंड हॉकी सर्तीचे फायनलींत सुवात मेळयली. हरमनप्रीत सिंगाच्या फुडारपणाखाला खेळपी भारतान चीन पंगडा आड सुपर 4तले निमाणे मॅचींत झणझणीत प्रदर्शन करून 7-0 अशें व्हड जैत जोडलें. फायनलींत भारताची मॅच दक्षीण कोरिया आड जातली.
भारता वतीन शिलानंद लाकडा, दिलप्रीत सिंह, मनदीप, राजकुमार पाल, सुखजीत सिंह आनी अभिषेक हांणी गोल केले. मॅच बादाबाद उरिल्ली जाल्यार लेगीत भारत फायनलींत पावतलो आशिल्लो. पूण, भारतान आपलो शेक दवरीत जैत जोडलें.
हे मॅची आदीं जाल्ले दुसरे मॅचींत दक्षीण कोरिया पंगडान मलेशिया पंगडा आड 4-3 अशें निसट्टें जैत जोडलें. हे हारीक लागून मलेशियाचें फायनलींत पावपाचें आव्हान सोंपलें. जाल्यार दक्षीण कोरिया फायनलींत सुवात मेळोवपाक येसस्वी थारलो. फायनल आयज जातली.
भारतान मॅचीक उत्कृश्ट सुरवात केली. मॅचीच्या चवथ्याच मिनटाक शिलानंद लाकडान गोल केलो. ते उपरांत सातव्या मिनटाक भारतान दुसरो गोल केलो. पॅनल्टी कॉर्नराचेर दिलप्रीत सिंहान गोल करून भारताची आघाडी 2-0 अशी केली.
दुसऱ्या क्वॉर्टरांत लेगीत भारतान आपलो शेक कायम दवरलो. पॅनल्टी कॉर्नराचेर मनदीप सिंगान गोल करून भारताची आघाडी 3-0 अशी केली. दुसऱ्या क्वॉर्टरांत लेगीत चीन बॅकफुटाचेर आशिल्लो. मध्यांतरा मेरेन भारत 3-0 असो मुखार आशिल्लो. पयल्या अर्दांत चीनाक एकूय पॅनल्टी कॉर्नर मेळूंक ना.
तिसऱ्या क्वॉर्टरांत भारतान दोन गोल केले. 37व्या मिनटाक राजकुमार पालान गोल केलो, जाल्यार 39व्या मिनटाक सुखजीत सिंगान फिल्ड गोल केलो. तिसऱ्या क्वॉर्टरांत लेगीत चीनाक पॅनल्टी कॉर्नर मेळूंक ना.
चवथ्या क्वॉर्टराचे सुरवातीकूच भारतान गोल केलो. अभिषेकान भारता खातीर सवो गोल केलो. 50व्या मिनटाक भारतान मॅचींतलो सातवो गोल केलो.
भारताच्या ह्या जैताचो दक्षीण कोरियाक लेगीत फायदो जालो. शुक्रारा मेरेन गटांत निमाणे सुवातेर आशिल्ल्या कोरियान मलेशिया आनी चीन ह्या पंगडांक फाटीं घालून फायनलींत सुवात मेळयली. दक्षीण कोरियान पांच खेपे ही सर्त जिखल्या जाल्यार भारतान तीन खेपे वस्तादपण जोडलां.
हरमनप्रीत सिंगाच्या फुडारपणाखाला खेळपी भारतान सुपर 4त उत्कृश्ट प्रदर्शन केलें. पयले मॅचींत ताणें दक्षीण कोरिया पंगडाक 2-2 असो बरोबरींत आडायलो. ते उपरांत मलेशियाक 4-1 असो हारायलो आनी चीना आड व्हड जैत जोडलें. ते पयलीं गट पांवड्या वयले मॅचींत भारतान चीना आड 4-3 अशें निसट्टें जैत जोडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
