भांगरभूंय | प्रतिनिधी
पणजी : केंद्रीय वीज खात्याच्या ऊर्जा कार्यक्षमता विभागान जारी केल्ल्या निर्देशांकांत गोंयची घसरण जाल्या. पोरूंचे तुळेंत अंदूं गोंयचे 14 गूण उणे जाल्यात. अंदूं गोंयाक ऊर्जा कार्यक्षमतेंत फक्त 20.68 गूण मेळ्ळ्यात. विभागान गोंयांत ऊर्जा वाडोवचे खातीर केल्ल्या उपाय येवजण्यांचो नियाळ घेवन गूण दिल्यात. तातूंत विवीध मळांचो आस्पाव केल्लो.
ऊर्जा कार्यक्षमता विभागान कृशी, इमारती, वीज वितरण कंपनी, उद्देगीक मळ, नगरपालिका सेवा, येरादारी हांचे सयत हेर विवीध मळांचेर वापरतात ते तशेंच वाटायतात ते ऊर्जेचो अभ्यास केलो. गोंयच्या कृशी मळार 0.45 गूण मेळ्ळे. इमारत विभागांत 3.41, वितरण कंपनी विभागांत 6.82, उद्देगांत 1.36, येरादारी विभागांत 5.32, नगरपालिका विभागांत 0.23 जाल्यार हेर मिश्र विभागांत 3.18 गूण मेळ्ळे.
निर्देशांकां खातीर ऊर्जेच्या वापरा प्रमाण राज्य आनी केंद्रशासीत प्रदेशांची पांच गटांत विभागणी केल्ली. तातूंतल्या तिसऱ्या गटांत गोंया सयत आसाम, हिमाचल प्रदेश, जम्मू आनी काश्मीर, उत्तराखंड आनी दादरा, नगर हवेली, दमण आनी दीव हांचो आस्पाव आशिल्लो. ह्या गटांत आसाम 52.05 गुणां सयत पयले सुवातेर आशिल्लो जाल्यार गोंय दुसरे सुवातेर आशिल्लें. पोरूंचे तुळेंत गोंयान येरादारी आनी कृशी विभागांत बरी कामगिरी केली. जाल्यार इमारत विभागांत गोंयाक उणे गूण मेळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
