भांगरभूंय | प्रतिनिधी
64 वो राष्ट्रीय शिक्षक दीस मनयलो
पालकांनी सकारात्मक नदर दवरपाचो उलो
सरकारी शाळांनीय बर्यो सुविधा, प्रशिक्षीत शिक्षक
भांगरभूंय | प्रतिनिधी
पणजी : गोंयांतल्या एकाच शिक्षकाच्या शाळांक आनीक शिक्षक दिवपाचें काम सुरू जालां. येवपी शिक्षणीक वर्सा गोंयांतल्या एकूय शाळांनी एकूच शिक्षक आसचो ना, अशें मुख्यमंत्री डॉ. प्रमोद सावंत हांणी सांगलें. 64 व्या राष्ट्रीय शिक्षक दिसा निमतान आयोजीत कार्यावळींत ते उलयताले.
ह्या वेळार शिक्षण सचीव प्रसाद लोलयेंकार, संचालक शैलेश झिंगडे, एससीईआरटी संचालक मेघना शेटगांवकार, समग्र शिक्षा संचालक शंभू घाडी हाजीर आशिल्ले. ताचे पयलीं पुरस्कार मेळिल्ल्या शिक्षकांचो भोवमान केलो.
मुख्यमंत्र्यान म्हणलें, गोंयांत सुमार 700 सरकारी, जाल्यार 140 खाजगी अनुदाना बगर शाळा आसात. अशें जरी आसलें तरी सरकारी शाळां परस खाजगी शाळांनी विद्यार्थी चड आसात. पालक चड पयशे दिवन खाजगी शाळेंत भुरग्यांक धाडटात. हे विशीं आमचे कडल्यान कितेंय उणाव जाता जाल्यार तातूंत नक्की सुदारणा जातली. मात पालकांनीय हे विशीं चड विचार करपाची गरज आसा.
सरकारी शाळांनीय बर्या दर्जाच्यो सुविधा आनी प्रशिक्षीत शिक्षक आसात. खाजगी शाळा इंग्लीश माध्यमांच्यो आशिल्ल्यान पालक थंय शिक्षण दिवपाचो विचार करतात. सरकारी मुळावे शाळेंत मराठी आनी कोंकणी सयत इंग्लीश विशयूय बरे तरेन शिकयतात. इंग्लीश विशया खातीर प्रशिक्षीत शिक्षक नेमल्यात. पालकांनी सरकारी शाळां विशीं सकारात्मक नदर दवरची. खाजगी अनुदानीत नाशिल्ल्या शाळांचेर शिक्षण खात्याचें पुरायेन नियंत्रण नासता. हांगच्या शिक्षकांक शिकोवपाचें प्रशिक्षण दिलां आसतलेंच अशें ना. पालकांनी हाचोय विचार करचो, अशें मुख्यमंत्र्यांनी सांगलें.
2030 मेरेन एनईपीची 100 टक्के अंमलबजावणी
शिक्षण खातें 2030 मेरेन राष्ट्रीय शिक्षण धोरणाची (एनईपी) 100 टक्के अंमलबजावणी करपाचो यत्न करतात. एनईपींत शिक्षकांची भुमिका म्हत्वाची आशिल्ल्यान खात्या वतीन तांकां प्रशिक्षण दितात, अशें प्रसाद लोलयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
