भांगरभूंय | प्रतिनिधी
कुचेले रस्त्या वयलीं फोंडकुलां चुकयतना अपघात
भांगरभूंय । प्रतिनिधी
म्हापशें : म्हापशेंच्या कुचेली- मार्ना रस्त्याचेर पडिल्लीं फोंडकुलां चुकयतना दुचाकी वयलें नियंत्रण सुटून मोटरसायकल रस्त्या कुशीचे राखणे वणटीक आनी झाडाक आपटली. ह्या भिरांकूळ आपअपघातांत समीर उदय नायक (25. रा. थिवी, मूळ सांघवी- पुणे) हाका मरण आयलें.
हो अपघात शुक्रारा 5 सप्टेंबराक फांतोडेर 1 वराच्या सुमाराक घडलो. समीर हिरो एक्सप्लस मोटारसायकली (एमएच 14 एमएन 7492) वयल्यान शिवोलेच्यान मार्ना मार्गान कुचेले वतालो. कुचेली पॅत्रॉल पंपा कडल्या रस्त्या वयलीं फोंडकुलां चुकयतना ताचें दुचाकी वयलें नियंत्रण सुटलें. दुचाकी पयलीं रस्त्याचे कुशीक आशिल्ल्या राखणे वणटीक आनी उपरांत पणसाच्या झाडाक नेटाक आपटली.
समीरान हॅल्मेट घातिल्लें, मात अपघातांत ताचें तोंड झाडाक नेटान आपटिल्ल्यान ताका गंभीर दुखापत जाली. ताका तत्काळ अॅम्ब्युलन्सींतल्यान म्हापशें जिल्हो हॉस्पिटलांत व्हेलो, मात दोतोरांनी तपासले उपरांत ताका मरण आयिल्ल्याचें जाहीर केलें. म्हापशें पुलीस उपनिरिक्षक मंगेश पाळणी आनी हवालदार तुषार रेडकार हांणी अपघाताचे सुवातेर वचून पंचनामो केलो.
समीर नायक हो आर्किटेक्ट आशिल्लो आनी आसगांवच्या रिओ हॉलिडे होम्स रिसॉर्टांत काम करतालो. ताचो बापूय महाराष्ट्र पुलीस खात्यांत उपनिरिक्षक पदा वयल्यान सेवा निवृत्त जाला. मूळ गांव कारवार आशिल्ल्यान समिराचे कुडीचेर निमाणे संस्कार करपाची वेवस्था थंय करतले.
धारबांदोड्यां अपघातांत एकल्याक मरण
धारबांदोडेंच्या देवसडो वाठारांत ट्रक आनी दुचाकी हांचे मदीं अपघात जालो. ह्या अपघातांत दुचाकीचे फाटल्यान बशिल्लो तुषार नायक (21. किर्लपाल- वाघोण) हाका मरण आयलें. जाल्यार चालक अभिषेक गांवकार (20. किर्लपाल- वाघोण) हो गंभीर जखमी जाला. ताका मुळाव्या उपचारा उपरांत धारबांदोडेंच्या मुळाव्या भलायकी केंद्रांतल्यान जीएमसींत व्हेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
