भांगरभूंय | प्रतिनिधी
म्हापशें : कुचेली- मार्ना रस्त्यार पडिल्लीं फोंडकुलां चुकयतना दुचाकीवेल्यान नियंत्रण सुटून मोटारसायकल रस्त्या कुशीकचे राखणे वण्टीक आनी झाडाक आपटली. ह्या स्वयं अपघातांत समीर उदय नायक (२५, रा. थिवी, मूळ गांव सांघवी- पुणे) हाका मरण आयलें. हो अपघात शुक्रारा, ५ सप्टेंबराक सकाळीं जालो.
चड म्हायती प्रमाण, समीर हो एमएच १४ एमएन ७४९२ नंबराचे मोटारसायकली वेल्यान मार्ना मार्गान कुचेली वतालो. कुचेली पेट्रोलपंपा लागसार रस्त्यावेलीं फोंडकुलां चुकयतना तांचें दुचाकीवेलें नियंत्रण सुटलें. दुचाकी पयली रस्त्या कुशीकचे राखणे वणटीक आनी उपरांत पणसाच्या झाडाक नेटान आपटली. समीरान हॅल्मेट घाल्लें. मात ताचें तोंड झाडाक नेटान आपटिल्ल्यान गंभीर दुखापत जाली. ताका ऍम्बुलन्सींतल्यान म्हापशें जिल्लो हॉस्पिटलांत व्हेलो, मात दोतोरांनी तपासणेंत ताका मरण आयिल्ल्याचें सांगलें. पुलीस उपनिरीक्षक मंगेश पाळणी आनी हवालदार तुषार रेडकार हांणी घडणुके सुवातेर पंचनामो केलो.
समीर नायक हो आर्किटेक्ट आनी आसगांवच्या रिओ हॉलिडे होम्स रिसॉर्टांत काम करतालो. ताचो बापूय महाराष्ट्र पुलीस खात्यांत उपनिरीक्षक पदावेल्यान निवृत्त जाला. मूळ गांव कारवार आशिल्ल्यान समीराले निमणे संस्कार थंयच जातले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
