भांगरभूंय | प्रतिनिधी
मडगांव : बाणावले दर्यादेगेर भोंवपा खातीर आयिल्ल्या पर्यटकान रेंट अ कार दर्यादेगेर चलयतना ती रेंवेंत रोमली. पर्यटक पुलिसां वतीन तांचे कडेन दंडात्मक कारवाय केली. पर्यटकान हांगा कसलेच तरेचो तक्टो नाशिल्ल्यान गाडी दर्यादेगेर व्हेल्ल्याचें स्पश्ट करीत सुचवण्यांचो तक्टो लावपाची मागणी केली.
बाणावले दर्यादेगेर शुक्रारा सकाळीं ही घडणूक घडली. परदेशांत रावपी आशिल्ल्या के. पटेल नामक पर्यटकान बाणावले दर्यादेगेर भाड्यान घेतिल्ली थार गाडी हाडिल्ली. चलयतना गाडी रेवेंत रोमली. रेवेंत आडकून उरिल्ली गाडी भायर काडपाच्या नादान ती आनीक रोंमपाक लागली. ह्या प्रकरणा उपरांत दर्यादेगेवेल्या पर्यटक पुलिसांनी पर्ळटकाक दर्यादेगेर गाडी चालोवपाक बांदी आशिल्ल्याचें सांगीत दंडात्मक कारवाय केली.
पर्यटक के. पटेल हांणी सांगलें, आपूण कामा निमतान परदेशांत आसता. हांगा गाडी भाड्यान घेतली आनी गुगल मॅपाचो वापर करुन बाणावली दर्यादेगेर पावलों. हांगा रस्त्यार खंयच दर्यादेगेर गाडी चलोवपाक बंदी आशिल्ल्याचो तक्टो लावंक ना. तशें आशिल्लें जाल्यार आमी गाडी दर्यादेगेर हाडचे नासले. आतां दर्यादेगेर गाडी हाडिल्ल्यान दंड भरपाचीय तयारी आसा. मात आडकल्ली गाडी काडपाक कसलेच तरेची वेवस्था ना. थळाव्या प्रशासनानूय दयारदेग वाठारांत सुचवणी तक्टे लायल्यार आपल्या सारकिल्ल्या पर्यटकांक हांगा गाडी चलोवप बंदी आशिल्ल्याचें समजतलें आनी मुखार त्रासूय जावचे ना, अशें तांणी सांगलें.
उपरांत पर्यटकान दंडात्मक रक्कम फारीक केली. तशेंच कामगारांक आपोवन गाडी रेवेंतल्यान भायर काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
