भांगरभूंय | प्रतिनिधी
पणजी : गोवा लोकसेवा आयोगा वतीन (जीपीएससी) राज्य नागरी सेवा कनिश्ठ अधिकार्यांच्या 38 सुवातींचेर भरती करतले. सगल्या सुवातां खातीर आयोगाच्या संकेत थळांचेर ऑनलायन तरेन अर्ज करपाची निमाणी मुजत 19 सप्टेंबर मेरेन आसा. हजारांनी उमेदवारां कडल्यान प्रतिसाद मेळपाची शक्यताय आसा. हाका लागून जीपीएससीन 60 गुणांची आनीक पूर्व छाननी परीक्षा घेवपाचो निर्णय घेतला.
वट्ट 38 जागां मदले 11 ओबीसी, 5 ईडब्ल्यूएस आनी 6 सुवातो एसटी समाजाच्या उमेदवारां खातीर राखीव आसतल्यो. जाल्यार 16 सुवातो अनारक्षीत आसतल्यो. सगल्या सुवातां खातीर पिराय मर्यादा 40 वर्सां आशिल्ल्यान सुदारीत मॅट्रीक्स लेव्हल 10 प्रमाण वेतन दितले. उमेदवारा कडेन मान्यताय आशिल्ल्या विद्यापीठाची पदवी आसप गरजेचें. उमेदवारांक कोंकणी भाशेचें ज्ञान आसप गरजेचें. नेमां प्रमाण उमेदवारां खातीर पिरायेची मर्याद चडांत चड 50 वर्सां मेरेन वाडयतले.
पुर्व छाननी परिक्षा 75 मिनटांची आसतली. हातूंत उमेदवारांना 60 भोव पर्यायी प्रस्न विचारतले. हे परीक्षेंत नापास जाल्ल्या उमेदवारांक आनीक एक फावट परिक्षा दिवपाची संद दितले. हे खातीर पास जावंक नाशिल्ल्या उमेदवारांनी परत अर्ज करपाची गरज ना. तांकां हे विशीं आयोगा वतीन कळयतले. उपरांत पात्र उमेदवारांची 75 गुणांची सीबीआरटी परीक्षा घेतले.
सीबीआरटींत पास जाल्ल्या उमेदवारांची चार टप्प्यांत लिखीत परीक्षा घेतले. ही परीक्षा वट्ट २50 गुणांची आसतली. हातूंत पात्र थारिल्ल्या उमेदवारांक तोंडी परीक्षे खातीर आपयतले. तोंडी परीक्षा 40 गुणांची आसतली. उमेदवारांनी अर्ज भरचे पयलीं आयोगाचे वेबसायटीवेल्यो सुचवण्यो वाचप गरजेचें. अर्जांचेर मोबायल नंबर आनी ई-मेल योग्य पद्धतीन बरोवपाचो उलो आयोगान मारला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
