भांगरभूंय | प्रतिनिधी
पणजी : केंद्रीय शिक्षण खात्याच्या 2025 च्या राष्ट्रीय संस्थात्मक वळेरी फ्रेमवर्क (निर्फ) वळेरेंतल्यान गोंय विद्यापीठ गायब जालां. पोरूं निर्फ वळेरेंत 151- 200 ह्या टप्प्यांत आशिल्ल्या गोंय विद्यापिठाक अंदूं खंयच्याच टप्प्यांत सुवात मेळोवपाक जाली ना. अशें आसलें तरीय राज्य विद्यापिठां हे श्रेणींत गोंय विद्यापीठ 51 ते 100 ह्या टप्प्यांत आसा. म्हाविद्यालय श्रेणींत गोंयांतल्यो पांच जाल्यार फार्मसी, अभियांत्रिकी, वेवस्थापन ह्या श्रेणींतल्या 4 म्हाविद्यालयांचो हे वळेरेंत आस्पाव जाला. जाल्यार कांय सरकारी म्हाविद्यालयांनी हे वळेरेंत वांटोच घेवंक नाशिल्ल्याची म्हायती मेळ्ळ्या.
केंद्रीय शिक्षण खात्यान बिरेस्तारा निर्फ वळेरी जाहीर केली. हे वळेरींत टॉप 200 वळेरेंत गोंयांतल्या एकाय म्हाविद्यालयांक, विद्यापिठाक वा शिक्षण संस्थांक सुवात मेळोवपाक जाली ना. म्हाविद्यालय विभागांत 151 ते 200 ह्या टप्प्यांत पणजेच्या धेंपो म्हाविद्यालयाचो आस्पाव जाला. जाल्यार 201 ते 300 ह्या टप्प्यांत मडगांवचें पार्वतीबाई चौघुले म्हाविद्यालय, फोंडेंचें पीईएस रवी नायक म्हाविद्यालय, म्हापशेंचें सेंट झेवियर ह्या म्हाविद्यालयांचो आस्पाव आसा. देशभरांतल्या टॉप वेवस्थापन (मॅनेजमेंट) अभ्यासक्रम शिकोवपी संस्थां मदीं गोंय सांखळेच्या गोवा इन्स्टिट्यूट ऑफ मॅनेजमेंटान (जीआयएम) 43 वो नंबर मेळयला. पोरूं हे श्रेणींत जीआयएम 37 व्या नंबरार आशिल्लें. पणजेच्या गोवा फार्मसी म्हाविद्यालयान फार्मसी श्रेणींत 42.70 गूण मेळोवन 89 वो नंबर मेळयला. पोरूं हें म्हाविद्यालय 93 वे सुवातेर आशिल्लें. जाल्यार अभियांत्रिकी श्रेणींत आयआयटी गोंय आनी एनआयटी गोंय हांकां 101- 150 ह्या टप्प्यांत सुवात मेळोवंक जाली ना.
आयआयटी मद्रास पयले सुवातेर
अंदूंचे निर्फ वळेरेंत आयआयटी मद्रास 87.31 गुणां सयत देशांत पयले सुवातेर आयलें. ते उपरांत आयआयएस बंगळुरू, आयआयटी मुंबय, आयआयटी दिल्ली हांचो नंबर लागता. दिल्लीचें एम्स आठवे, जवाहरलाल नेहरू विद्यापीठ णववे जाल्यार बनारस हिंदू विद्यापीठ धावे सुवातेर आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
