भांगरभूंय | प्रतिनिधी
मडगांव: तरणाटे कडेन समाज माध्यमां वेल्यान इश्टागत करून तिचे कडल्यान पयशे घेतले, उपरांत लग्नाचें हांयस दाखोवन तिचेर लैंगीक अत्याचारूय केल्ल्या प्रकरणांत दुबावीत मेल्सन कुतिन्हो हाका सशर्त जामीन मंजूर केलो.
मेळिल्ले म्हायती प्रमाण दुबावीत, मेल्सन कुतिन्हो (45) हाणें कुंकळ्ळी वाठारांतले एके 27 वर्सा पिरायेचे तरणाटे कडेन स्नॅपचॅट ह्या समाज माध्यमा वेल्यान संपर्क सादून इश्टागत केली. उपरांत आपल्या कुटुंबांत अडचण आशिल्ल्याचें सांगून सुरवेक 20 हजार, उपरांत 30 हजार रोख रक्कम घेतली. उपरांत ताणें आनीक पयशांची मागणी केली तेन्ना तरणाटेन आपले कडल्यो सुमार 90 लाखांच्यो भांगराच्यो वस्ती ताका दिल्यो. उपरांतूय तिचे कडेन गोड उलोवन लग्न करतां अशें सांगून तिचेर लैंगीक अत्याचार केले.
ह्या प्रकरणांत फटवणूक जाल्ल्याचें लक्षांत येतकच पिडितेन कुंकळ्ळी पुलिशेंत कागाळ दाखल करतकूच पुलिसांनी ताका अटक केल्ली. दुबाविताक दक्षीण गोंय जिल्हो सत्र न्यायालयान 50 हजाराचो वैयक्तीक बाँड, तितलेच रकमेचो हमिदार, तपासांत सहकार्य करप, पुरावे नश्ट करपाचो यत्न न करप, न्यायालयाचे परवानगे बगर गोंया भायर वच्चें न्हय अशा अटींचेर जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
