भांगरभूंय | प्रतिनिधी
पणजी : तिळारीच्या कमांड वाठारांत शेतजमनीचो आस्पाव करपाक आमदारांनी विरोध केलो. काडा जमनींतल्यान शेतजमीन कुशीक काडची अशी मागणी आमदार प्रवीण आर्लेकार आनी प्रेमेंद्र शेट हांणी केली. उदका पुरवण मंत्री सुभाष शिरोडकार हांच्या फुडारपणा खाला तिळारीच्या कमांड एरीया डेवेलोपमेंट अथोरीटीची (काडा) बसका जाली.
हे बसकेक पेडणेंचे आमदार प्रवीण आर्लेकार, शिवोलेच्यो आमदार डिलायला लोबो, हळदोणेंचे आमदार कार्लोस फेरेरा, मयेंचे आमदार प्रेमेंद्र शेट हाजीर आशिल्ले.
खडकाळ आनी पिकावळी खातीर योग्य नाशिल्ली जमीन काडा खाला घालतलें. हे विशीं निमणो निर्णय आजून मेरेन जावंक ना, अशें बसके उपरांत उदका पुरवण खात्याचे मंत्री सुभाष शिरोडकार हांणी सांगलें.
शेती खातीर तिळारीचें उदक गरजेचें आसा. पेडण्यांतले बरेच लोक शेती आनी बागायतीचेर उदरनिर्वाह करतात. काडा जमनींतल्या शेत जमीन कुशीक काडची अशी मागणी आसा. बसकेंत लेगीत हांवें ही मागणी केली, अशें प्रवीण आर्लेकार हांणी सांगलें.
उदकाचो उणाव पयस जावपा खातीर तिळारीच्या उदकाची गरज आसा. शिवोली वाठारांत शेतीक उदक मेळपा खातीर कालवें तशेंच पायपाची दुरूस्ती करपाक जाय, अशें आमदार डिलायला लोबो हांणी सांंगलें.
धारगळ वाठारांत रिसॉर्टा खातीर लाखों चौमी जमीन काडा वाठारांतल्यान भायर काडपाक मंत्रिमंडळान मान्यताय दिल्या. काडाचे मान्यताये बगर सरकार हो निर्णय घेवं शकाना, अशें आमदार कार्लोस फरेरा हांणी सांंगलें. हे विशीं बसकेंत मात कसलोच निर्णय जावंक ना
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
