कृत्रीम बुद्दीचो भंय कित्याक ?

भांगरभूंय | प्रतिनिधी

कृत्रीम बुद्दीचो वापर करून गोंयकारांनी लेगीत स्वयंपूर्ण गोंय करचे खातीर आपलें योगदान दिल्यार कशें कितें ?

मनशाक आपले भितर आशिल्ल्या गुणांची पुराय जाणविकाय जाता तेन्ना तो बिनधास्तपणान वावर करूंक लागता आनी आपलो हावेस तडीक व्हरूंक पावता. ज्या विशयाचें ताका गिन्यान आसना त्या विशयांत तो जैत मळोवंक फाटीं पडटा पूण जेन्ना तो अभ्यास करून आपल्याक जाय त्या विशयाचें गिन्यान मेळयता तेन्नाच तो सफळ जावंक पावता. दरेक मनशांचें गुपीत म्हणल्यार तो जेन्ना आपली जीण नियंत्रीत दवरता तेन्नाच तो स्वताक सुरक्षीत समजूंक लागता. ज्या गजालींचेर ताचें नियंत्रण आसना त्यो गजाली आपल्याक धोको दिवंक शकता असो विचार ताच्या मनांत येता, आनी मागीर त्या गजालींचो ताका भंय दिसपाक लागता. आतां एआय ची म्हणल्यारच ‘कृत्रीम बुद्दीची’ गजाल घेवया. आयज ह्या एआय विशीं मनशां भितर गिन्याना परस अन्यायच भोव भरिल्लें आशिल्ल्यान तांकां ताचो भंय दिसूंक लागप सभावीक जावन आसा. आतां आदलो काळ उरूंक ना, आयज परंपरा आनी आधुनीकता, सैम आनी विज्ञान, मनीस आनी यंत्रां, जमीन आनी उदक, सावळी आनी उजवाड हांचो खूब सुंदर मेळ आमी संवसारभर पळयतात. तरी आसतना विद्वान मनीस सैमाचें कुवाडें पुरायपणान सोडोवंक पावंक नाशिल्ल्यान तो कसल्या ना कसल्या चिंतनांनी घुसपल्लो पळोवंक मेळटा.
हालींसराक मनशाक कृत्रीम बुद्दीचो हावको पिडपाक लागला. हो हावकोच ताची न्हीद पिड्ड्यार करपाक कारण थारता, ही बरेंपणाची लक्षणां न्हय अशें म्हाका तरी दिसूंक लागलां. कृत्रीम बुद्दीक लागून आतां मुखार कितें हो प्रस्न मनशाचे तकलेंत घोळपाक लागतकच आपल्या फुडारा विशीं चिंतून तो मनीस आकूळ पिकूळ जाल्लो दिसता. ही बुद्दी मनशांची सुवात केन्ना घेत हे भिरांतीन मनीस घुस्मटत जियेवंक लागला.
संवसाराचेर नदर मारीत जाल्यार आज मनीस कृत्रीम बुद्दीच्या बळारच फुडारपण जोडपाक लागला. ही गजाल कोणायच्या मतींत येवंक कळाव लागचो ना. तेच परी आयज एआय वेगळ्या वेगळ्या मळार आपलें पांय रोवूंक लागला. ताच्या आदारान मनीस सक्षम निर्णय घेवंक शकतात पूण ताच्या मनांत आशिल्लो भंय मात तो पयसावंक पावंक ना. म्हाका प्रस्न पडटा कोणें केलां हें एआय ? मनशांनीच न्हय. मागीर ताका कित्याक भियेवप तर? जाणे ताका जल्माक घाला तो श्रेश्ठ आसूंक जाय आशल्लो न्हय. म्हणटकच मनशाची बुद्द एआयचे परस व्हड आसूंक जाय. हाचें मुखेल कारण म्हणल्यार मनशां भितर व्हांवता तसो विचारांचो झरो कृत्रीम बुद्दीन तयार केल्ल्या जिन्नसां भितर व्हांवंक खूब कठीण. हाकाच लागून हांव म्हणन भिवपाची गरज ना.
आतां चीनाचीच गजाल घेवया. थंय खंय आरोग्य सेवा, स्वयंचलीत वाहनां आनी उत्पादन क्षेत्रांक गती दिवचे खातीर कृत्रीम बुद्दीचो उपेग व्हड प्रमाणांत करतात. तेचप्रमाण थंयच्या शारांची देखरेख करचे खातीर तशेंच सुरक्षा आनी प्रशासन, ते भायर लश्करी प्रयोग करचे खातीर लेगीत ते एआयचो उपेग करतात. चीन शिक्षण क्षेत्रांत लेगीत एआयचो प्रयोग करपाक लागला तेन्ना भारतान फाटीं कित्याक रावचें ? जे तरेन शाळा स्कुलांनी कोडींग शिकोवंक लागल्यात तेच तरेन आमी एआय हो विशय लेगीत भुरग्यांक शिकोवंक सुरवात करूंक जाय. शिकपी भुरग्यांक जेन्ना ह्या विशयाचें ज्ञान प्राप्त जातलें तेन्नाच त्या विशया विशींचे तांच्या मनांत आशिल्ले गैरसमज पयस जावंक पावतले. चीनी नागरिकां मदीं एआयचो भंय पयस जावंक कारण म्हणल्यार तांणी कृत्रीम बुद्दीचो वापर खूब बरे तरेन करून घेतला आनी आपलो आत्मविस्वास घट्ट केला. सदचे जिणेंतलीं बारीक सारीक कामां लेगीत चीनी लोक एआयच्या आदारान करून घेतात आनी आपलें जिवीत सोंपें आनी सुंदर करूंक लागल्यात.
आमी लेगीत आतां सावन तरणाट्यांक एआयचो उपेग करचे खातीर योग्य माची दिवन बदलत्या काळाक तोंड दिवंक तांकां तयार करूंक जाय. कांय जाण भंय पातळावचे खातीर कृत्रीम बुद्दीचो आदार घेतात. एआयक लागून मनशां खातीर आशिल्ल्यो नोकऱ्यो उण्यो जातल्यो खंय? एआय मनशांची सुवात घेतलो खंय? अश्यो गजाली कानार पडटात त्यो वावड्यो जावन आसात. कोणे ताचेर लक्ष दिवचें न्हय. कारण कांय मनीस वेगळ्या वेगळ्या समाज माध्यमां वरवी नाका आशिल्ल्यो वावड्यो पातळावपाचो यत्न करतात. अशा वेळार मनशान सादुरताय बाळगूंक जाय. भारतीयान कोणाच्याच हातांतलें बावलें जावंक फावना. आपले स्वतंत्र बुद्दीन विचार करून पावल मारूंक जाय. नव्या नव्या क्षेत्रांत ‘मेक इन इंडिया’ सारकिल्ले प्रकल्प तयार जावंक जाय. कृत्रीम बुद्दीचो वापर करून गोंयकारांनी लेगीत स्वयंपूर्ण गोंय करचे खातीर आपलें योगदान दिल्यार कशें कितें ? शिक्षीत तरणाट्यांनी विचार करून कामाक लागल्यार जाता. आज तरेकवार मळार एआयचो फावो तसो उपेग करून घेवं येता. खास करून वेवसायीक मळार ह्या हत्याराचो फावो तसो वापर करून सांगणका वरवीं वेगळीं वेगळीं कामां पुराय करूं येतात. वेवसायीक बसकां खातीर तयारी करप, वेगळ्या वेगळ्या खात्या वतीन आयोजीत जावपी तरेकवार कार्यावळींनी एआयचो भरपूर उपेग करूं येता. तशेंच एआय च्या आदारान मुलाखती खातीर वेळेचें आयोजन करप खूब सोंपें जावंक पावता. आयज कृत्रीम बुद्दीक लागून संवसारभरच्या वेवसायीक मळार सुमारा भायल्यो संदी मनशां खातीर तयार जाल्ल्यो पळोवंक मेळटात. जाचो लाव नवें पिळगेंतल्या तरणाट्यांनी घेवंक जाय.
एआय मनशाक आकर्शीत तर करताच तेच बराबर मनशाची कुशळटाय वाडोवंक मजत करता. आयज एआय पुराय संवसाराचेर आकर्शणाचो विशय जाल्लो आसा. आयची पिळगी ‘जी जनरेशनाची’ आशिल्ल्यान ते आपले भितर फावो तसो बदल रोखडोच घडोवन हाडूंक शकतात. गरज आसा ती ह्या तरणाट्यांक खास प्रशिक्षण दिवपाची. एआयक लागून जे फांटे तयार जाल्यात तांचे प्रशिक्षण दिवपाची तयारी आमी करीत जाल्यार तरणाटे ताचो लाव घेवंक पावतले. एक नवी दिका तांकां दाखोवपाचो यत्न आमी करूंक जाय तेन्नाच तांचे भितर रिगिल्लो हो एआयचो हावको पळून वतलो.

एच मनोज
9822441417