भांगरभूंय | प्रतिनिधी
लायफ जॅकेटाक लागून चारूय नुस्तें मारपी वाटावले
भांगरभूंय । प्रतिनिधी
म्हापशें : शापोरा नुस्तेमारी जेटी वयल्यान नुस्तेमारी करचे खातीर दर्यांत गेल्लें व्हडें वागातोर दर्यादेगे पसून कांय अंतराचेर उमथलें. ह्या व्हड्याचेर आशिल्ल्या चारूय जाणांनी लायफ जॅकेटाचे मजतीन आपलो जीव वाटायलो. नुस्तें मारपी हेर व्हड्यांतल्या कामगारांनी ह्या बचाव वावरांत मजत केली.
ही दुर्घटणा बुधवारा फांतोडेर 4.45 वरांच्या सुमाराक घडली. शापोरा जेटी वयल्यान थळावे नुस्तेमार राज चोडणकार (शिवोली) पल्या आकाश (23), अंजुली (25) आनी संजय (24) ह्या खलाशी कामगारां सयत नुस्तें मारपाक गेल्ले. तांचें व्हडें वागातोर दर्यादेगे सावन दोन किलोमिटराच्या अंतराचेर दर्यांत एका वादळी ल्हारा वांगडा उमथलें.
व्हड्या वयल्या चौगांनीय लायफ जॅकेट घातिल्लें. ताका लागून ते उदकांत बुडूंक नात. ह्या व्हड्या फाटल्यान येवपी हेर नुस्तेमारी व्हड्यांतल्या कामगारांनी बचाव वावरांत वांटो घेतलो आनी चौगांकूय बरे तरेन दर्यादेगेर हाडले. तशेंच उमथल्लें व्हडे लेगीत धडेर हाडलें.
तळपाक आपटिल्ल्यान व्हड्याच्या मोटराची मोडतोड जाली. तशेंच जाळें व्हांवून गेल्ल्यान चोडणकार हांकां हे दुर्घटणेंत लुकसाण सोंसचें पडलें. मजगतीं, घडणुकेची म्हायती मेळटाच म्हापशें उजो पावोलपी दळाचे उपअधिकारी प्रकाश नाकान्नायक हांच्या फुडारपणा खाला अमोल सातार्डेंकार, दिप्तेश गावडे, प्रवीण पिसुर्लेंकार आनी विष्णू केसरकार, हणजूणें पुलीस तशेंच जीवरक्षकांनी घडणुकेचे सुवातेर धांव घेवन दुर्घटणेंतल्यान वाटावल्ल्या चौगांचीय खबर घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
