भांगरभूंय | प्रतिनिधी
पणजी : सेकंड हॅण्ड मोबायल फोन विकत घेवचे पयलीं केंद्रीय पोर्टलावेल्यान ताचो आयएमईआय नंबर तपासप गरजेचें आशिल्ल्याचें पुलीस महानिरीक्षक के. आर. चौरासिया हांणी सांगलें. मंगळारा गोंय पुलिसांनी सांडिल्ले वा चोरी जाल्ले ५० फोन सोदून ते मूळ धनयांक दिले. ह्या वेळार आयोजीत कार्यावळींत ते उलयताले. ह्या वेळार उत्तर गोंय पुलीस अधीक्षक राहुल गुप्ता आनी हेर पुलीस अधिकारी हजर आशिल्ले.
चौरासिया हांणी, गोंय पुलिसांनी हालींच परत दिल्ले चडशे फोन दुकानांत सेकंड हॅन्ड मोबायल म्हणून विकताले. हेर कोणेंय हे विकते घेतल्या आसत जाल्यारूय ते मुळांत चोरयेचे आशिल्ल्यान पुलिसांक ते ताब्यांत घेवचे पडटा. हाका लागून असले फोन घेवप्यांचें लुकसाण जाता. म्हणून फोन घेवचे पयलीं केंद्रीय दूर संचार खात्याच्या सीईआयआर पोर्टलाचो वापर करचो. सांडिल्ल्या वा चोरी जाल्ल्या फोना विशींय ह्या पोर्टलाचेर कागाळ करूं येता.
राहुल गुप्ता म्हणाले की, गोंय पोलिसांनी सीईआयआर पोर्टलार दाखल जाल्ल्या कागाळींची दखल घेवन ५० फोन सोदून काडल्यात. हातुंतले कांय फोन पर्यटकांचे आसात ते कुरियरा वरवीं धाडटले. ह्या उपक्रमांत पणजी कळंगूटे आनी हणजूण पुलीस स्टेशनांनी बरें काम केलें. हे फोन जांकां मेळटले तांकां नोटीस धाडल्या. तांचेर कायद्या प्रमाण कारवाय करतले. गोंय पुलिसांचो हो उपक्रम कायमचो सुरू जातलो.
असो फोन ट्रेस जाता
गुप्ता हांणी, सीईआयआर पोर्टलार कागाळ केले उपरांत त्या फोनाचो आयएमईआय नंबर ब्लॉक करतात. तो फोन परत वापरपाचो यत्न केल्यार लागसारच्या पुलीस स्टेशनांत अलर्ट धाडटात. अशे तरेन तो फोन ट्रेस करतात. उपरांत ताचें आयएमईआय अनब्लॉक करता.
तेलंगणा पुलिसांनी गोंय पुलिसांक म्हायती दिल्ली
म्हापश्यां नंबर प्लेट नाशिल्ल्या गाडयांचो व्हिडियो व्हायरल जाल्लो. हे विशीं गुप्ता हांणी सांगलें, ते गाडयेंत तेलंगणाचे पुलीस आशिल्ले. ते एका गुन्यांवकाराच्या फाटल्यान महाराष्ट्रांतल्यान हांगा आयिल्ले. तांणी हे विशीं गोंय पुलिसांक म्हायती दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
