भांगरभूंय | प्रतिनिधी
पेडणें: पेडणें मतदारसंघ सदांच गोंयच्या राजकी मळार चर्चेचो विशय थारला. हांगा थळावे प्रस्न, रोजगार, उदरगतीच्यो संदी, हाचे वांगडा उमेदवारांचे कार्यशैलीचेर मतदारांचें लक्ष लागिल्लें आसता. येवपी विधानसभा वेंचणुकेचे फाटभूंयेर आता पेडणेंच्या राजकारणांत दोन नवीं मुखामळां मुखार येतना दिसतात. हे दोगूय वैजकी मळार जुळिल्ले आसात.
गोंय वैजकी महाविद्यालयाचे सहाय्यक प्राध्यापक डॉ. उदय कुडाळकार आनी जीएमसी ब्लड बँकेचे डॉ. संजय कोरगांवकार हे भाजपाच्या उमेदवारीचे इत्सूक म्हणून सक्रीय जाल्यात. गणेशोत्सवाच्या निमतान तांच्या बॅनर्सांनी मतदारसंघ बरोच पर्जळपाक लागला. विवीध कार्यावळींतले तांचे हाजेरीक लागून दोगांयचें राजकी मुखामळ आनीक ठळक जावपाक लागलां.
डॉ. कुडाळकार हांचें काम फकत वैजकी सेवे पुरतें मर्यादीत ना. सम्राट क्लबा वरवीं तें गांवांगांवांनी पावल्यात. समाजीक, शिक्षणीक आनी सांस्कृतीक कार्यावळींतल्यान ते लोकांच्या लागीं गेल्यात. डॉ. कोरगांवकार हांणीय पेडण्यां समाजीक सक्रियता वाडयल्या. तांणी विवीध सर्ती आयोजीत करून तरणाट्यां मदीं उर्बा निर्माण केल्या.
पेडणेंचे आमदार प्रवीण आर्लेकार हे भाजपाचे प्रतिनिधी आसात. हाका लागून भाजपांत निर्माण जावपी उमेदवारी पेडणेंच्या राजकी समीकरणांत नवे बदल घेवन येतली, अशें दिसता.
दुसरे कडेन, मिशन फॉर लोकलाचे निमंत्रक राजन कोरगांवकार हे फाटले वेंचणुकेंत हारले उपरांतूय सेगीत कार्यरत उरल्यात. विवीध सर्ती, मेळावे आनी संवादांतल्यान तांणी आपली हजेरी मतदारसंघांत दवरल्या. आदले उपमुख्यमंत्री बाबू आजगांवकार हांणीय वेंचणुकेच्या मळार देंवपाचे स्पश्ट संकेत दिल्यात.
पेडणें भाजप मंडळाचें फाटबळ कोणाक?
सध्या पेडणें भाजप मंडळाचे अध्यक्ष सिद्धेश पेडणेंकार आसात. ते पक्षाचे सामके निश्ठावंत कार्यकर्ते आशिल्ल्यान, हे निश्ठेक लागूनच पक्षान तांचेर अध्यक्षपदाची जापसालदारकी दिल्या. मात मंडळांतलीं उरिल्लीं पदां ही मुखेलपणान सध्याचे आमदार प्रवीण आर्लेकार समर्थकांचीं आशिल्ल्याचें दिसून येता. हाका लागून एक प्रस्न आतां मतदारसंघांत चर्चेंत आसा. तो म्हणल्यार पेडणे भाजप मंडळ नव्या मुखामळांक तेंको दितलें? काय परत सध्याचे आमदार प्रवीण आर्लेकार हांकांच उमेदवारी मेळोवन दिवपाक एकवटान यत्न करतलें? हीच उमळशीक पेडणें मतदारसंघांतल्या लोकां मदीं सध्या वाडतूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
