भांगरभूंय | प्रतिनिधी
हालींच डॉ. प्रमोद सावंत हांणी मुख्यमंत्री म्हणून केल्ले ल्हानशे राजकी ‘शस्त्रक्रिये’न तांच्या सरकारांतलीं बऱ्याच काळा सावन आशिल्लीं दुखणीं कितले मेरेन उणीं जाल्यांत हें कळपाक मार्ग नासलो तरी ताका लागून एकंदर दुयेंसांतल्यान निश्चितूच तात्पुरती सुटका मेळ्ळी आसूंक जाय. वाडत वचपी दुयेंसाचेर मुख्यमंत्र्यान ‘शस्त्रक्रिया’ करप गरजेचें आशिल्लें. खरें म्हणल्यार ताचे परस व्हडली शस्त्रक्रिया करची पडटली अशी सगळ्यांक अपेक्षा आशिल्ली, पूण ती अपेसी थारली. ही शस्त्रक्रिया दिगंबर कामत आनी रमेश तवडकर हांकां मंत्रीमंडळांत घेवपा मेरेन मर्यादीत उरलीं आनी फुडाराक गरज पडल्यार राज्य विधानसभा वेंचणुके आदीं आनीक एक ल्हान शस्त्रक्रिया करपाचो पर्यायय मुख्यमंत्र्यान उक्तो दवरला. ते खातीर मायकल लोबो, संकल्प आमोणकार आनी हेरांक उणेच फुडले स म्हयने वाट पळोवची पडटली. सध्याचे परिस्थितींत मुख्यमंत्री डॉ. प्रमोद सावंत हांणी जो कितें निर्णय घेतला तो येवकार दिवपी म्हणचो पडटलो आनी सावधानपणान पावलां उखलीत मुखार वचपल हीच येसस्वी राजकारणाची गुरुकिल्ली आसा हाचें भान आशिल्ले लोकच अशे निर्णय घेतात. सगळ्यांक एकाच वेळार समाधानी करपाचो जो धोको आसा तो जाणून घेवन मुख्यमंत्री डॉ. सावंत हांणी धुर्तपणान ही चाल खेळ्ळी आसतली, अशें म्हणू येता. खाटीर आशिल्ल्या दुयेंतीची समजून काडून मोठी शस्त्रक्रिया फुडें धुकलप आपल्या हिताचें कशें आसा अशें दोतोर जें कितें करतात तेंच काम मुख्यमंत्र्यान केलें आनी किमान फुडले स म्हयने हें दुयेंस परतून तकली वयर काडचें ना हाची खात्री करून घेतली.
दिगंबर कामत आनी रमेश तवडकर हांचो मंत्रीमंडळांत आस्पाव करतना देड वर्स उरिल्ल्या विधानसभा वेंचणुकांचो भाजपान विचार केलो ना जाल्यार अजाप थारतलें. गोविंद गावडे हांणी तशें पळोवंक गेल्यार मुख्यमंत्र्याक तें बरेंच सोंपें केल्लें. देखून ही ल्हानशी शस्त्रक्रिया करतना दोतोराचेर इतलो दबाव येवपाचो प्रस्नूच नाशिल्लो. हांगा लक्षांत घेवपासारकें म्हणल्यार वेळ आयल्यार आनीक एक शस्त्रक्रिया करपाच्या हेतान हें सगळें केलां आनी येवपी वेंचणुको मतींत दवरून मुख्यमंत्र्यान आपले डावपेच आंखल्यात हें हांगां मतींत घेवंक जाय. भारतीय जनता पक्ष हो एकमेव पक्ष असो की तो वेंचणुके खातीर सदांच तयार आसा. देखून हें सगळें करतना ताणें सावधान भुमिका घेवप हें अपेक्षितूच आशिल्लें. भाजपाचो प्रदेश अध्यक्ष जाले उपरांत फातोड्डें मतदारसंघ परतून आपले कडेन ओडून हाडपा विशीं दामू नायक हांणी कांयच विचार केलो ना अशें जावंकूच शकना. दिगंबर कामत हांकां परतून भाजपांत व्हरतना दिल्ल्या उतरां मदीं मंत्रिमंडळाची हमी आशिल्लीच हे मान्य करूनय वेंचणुके आदीं मंत्रीपद तांकां दितना भाजपान फातोड्डेंच्या राजकी फुडाराचो विचार केलो ना अशें म्हणूंक जायना. दिगंबर कामत भाजपाच्या प्रदेश अध्यक्षाक फातोड्डें जिखपाक कितली मजत करूंक शकता तें फकत वेळ सांगतलो. रमेश तवडकार सभापती पदाचेर तशें केन्नाच समाधानी नाशिल्ले. गोविंद गावडे हांणी आपलो मार्ग सोंपो केला आनी आतां कला आनी संस्कृती खात्या वांगडाच आदिवासी उदरगत आनी खेळां हीं दोन म्हत्वाचीं खातींय आतां तांचे कडेन आशिल्ल्यान तांकां कागाळ करपाकूय सुवात ना.
विधानसभा वेंचणुके आदीं दिगंबर कामत आनी रमेश तवडकार हांची वरिश्ठताय मतींत घेतल्यार भाजपान तांकां मंत्रीमंडळांत सुवात दिवप अपरिहार्य आशिल्लें. हाचे वयल्यान भारतीय जनता पक्षान पयलींच वेंचणुकेचेर नदर दवरून कसो वावराक लागला तें हाचे वयल्या कळटा. आतां राज्यांतल्या हेर राजकी पक्षांचो विचार केल्यार काँग्रेस अजून जागी जाल्ली दिसना, जाल्यार आम आदमी पक्ष सोडल्यार हेर विरोधी पक्ष त्या मळार सक्रीय आशिल्ल्याचें चुकूनच दिसता. विजय सरदेसाय हांची गोवा फॉरवर्ड पार्टीय हालीं आपल्या बळग्या प्रमाण कांय प्रमाणांत तरी लोकां मुखार येवपाक लागल्या. फाटल्या वेंचणुकेंत गोंय रिव्होल्युशनरी पक्षाक मत टक्केवारीचे नदरेन खूब जैत मेळिल्लें आनी हे खेपे तांचे कडल्यान खर धक्को बसपाची अपेक्षा आसली तरी तांचें अस्तित्व खंयच जाणवना. अशे परिस्थितींत फुडले वेंचणुकेंत राजकी फायदो कोणाक मेळूं येता अशें कोणेंय विचारलें जाल्यार ताची जाप साहजिकूच भाजपा हीच आसतली. शिंपडिल्ले विरोधक हे देशांत सगळेकडेन भारतीय जनता पक्षाची एक शक्त जाल्यात आनी सध्याचें चित्र पळयल्यार येवपी विधानसभा वेंचणुकेंत गोंय हाका आडवाद आसपाची शक्यताय ना हें दिसता. फाटलीं णव वर्सां सत्तेर आशिल्ल्या भाजपाच्या फुडारपणा खाला आशिल्ल्या सरकाराचो एकूण वाटचाल पळयल्यार विरोधकांक पुराय चिड्डून उडोवपाची ताची भुमिका स्पश्ट दिसता. अशा वेळार शिंपडिल्ले विरोधक तांकां कितलो मेरेन शह दितले हो प्रस्नूच आसा.
विरोधकांच्या तथाकथित महागठबंधनाचें अस्तित्व देशांत चुकूनच खंय जाणवता. गोंयांत ‘इंडी’ युतीची नामोनिशाणी नाशिल्ल्यान येवपी विधानसभा वेंचणुकेंत पक्ष एकवटान भाजपा आड झगडटले अशी आस्त बाळगुपाचें कारण ना. दुसरे वटेन आम आदमी पक्ष सगल्या चाळीस जाग्यांचेर स्वताच्या बळग्याचेर लढपाक पुरायपणान सक्रीय आसा अशें दिसता. दिल्लीची आदली मुख्यमंत्री आनी आपची गोंयची प्रभारी अतिशी मार्लेना तर फाटल्या म्हयन्या सावन सतत गोंयांत भोंवतना दिसपाक लागल्यात. खंयचेय परिस्थितींत काँग्रेसी कडेन युती जावपाची शक्यताय न्हयकारतना काँग्रेसीक मत दिवपी लोकांनी भाजपाकूच दिवचीं अशेंय ती कळकळीन सांगतात. कांय दीस वाट पळयात, आपा कडेन राज्य विधानसभेंत विरोधी पक्ष फुडारी म्हूण पद आसूं येता. काँग्रेसीचे तीन आमदारांतले दोन आमदार खंयच्याय वेळार फुटून वचूंक शकतात अशेंय ती सुचीत करता. आदल्या जायत्या फुडाऱ्यांक ती मेळिल्ल्यान वेगवेगळे अदमास काडप सुरू जालां. काँग्रेस पक्षाची एकंदर परिस्थिती सामकी वायट जाल्या अशें दिसता. गोंयांत काँग्रेसीचो जागो आप घेवंक शकता काय ना हाचेर चर्चा आतां सुरू जाल्या. गोवा फॉरवर्डाक अजूनय काँग्रेस पक्षाचेर विस्वास आसा अशें दिसता.
पूण फाटले वेंचणुकेंत जें घडलें तें घडचें न्हय हे खातीर विजय सरदेसाय हांचो यत्न दिसता. आरजीपीचेंय एकला चलो रे जवळजवळ निश्चीत आशिल्ल्यान ह्या सगळ्यांचें व्हड मोल दिवचें पडचें न्हय म्हणून काँग्रेस पक्षाक शक्य तितले यत्न करचे पडटले, पूण ताचे खातीर तो कितलो तयार आसा ह्या प्रस्नाक जाप मात मेळना. आयज मगो पक्षूय काँग्रेसीक लागीं वचपाचो धोको घेवपाक तयार ना. भारतीय जनता पक्षाचो मार्ग सामको सोंपो दिसता, तो हेच खातीर.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
