भांगरभूंय | प्रतिनिधी
केंद्र सरकार : काँग्रेस, गोवा फॉरवर्ड पक्षाची टिका
भांगरभूंय | प्रतिनिधी
पणजी : केंद्र सरकारान हालींच कर्नाटकांतल्या हॉस्पेट- तीनईघाट ह्या 312 किलोमिटर रेल्वे मार्गाच्या दोट्टीकरणाचें काम पुराय जालां, अशी घोशणा आयतारा केली. हो प्रकल्प हॉस्पेट वास्को ह्या 363 किलोमिटराच्या रेल्वे मार्गाचें दोट्टीकरण येवजणेचो एक भाग आसा. हाचे उपरांत गोंयांत विरोधकांनी सेगीत प्रतिक्रिया उक्तायली. फाटल्या कांय वर्सां सावन ह्या प्रकल्पा आड आंदोलन जावन लेगीत केंद्र सरकारान तांचे कडेन आडनदर करून हो निर्णय घेतलो, असो आरोप काँग्रेस आनी गोवा फॉरवर्ड पक्षान केला.
हे विशीं रेल्वे अधिकार्यांनी दिल्ले म्हायती प्रमाण, रेल्वे मार्गाच्या दोट्टीकरणाक लागून कोळसो, लोह आनी स्टील येरादारी वेगान जावपाची आशिल्ल्यान प्रवासी येरादारीय सुदारतली. तशेंच हम्पी आनी गोंयच्या पर्यटनाकूय हाचो फायदो जातलो, असो दावो रेल्वे मंत्रालयान केला. मात हे दावे विरोधकांनी भायर मारल्यात.
मुरगांवच्या लोकांक पयलींच कोळसो येरादारीचे त्रास सोसचे पडटात. तरी ‘डबल इंजीन’ सरकार बळयां ह्या मार्गाचें दोट्टीकरणाचें काम करता. निमाणे केंद्रान मान्य केलें, हो प्रकल्प कोळसो येरादारी खातीरूच आसा. गोंय सरकार सदांच म्हणटालें, हो प्रकल्प कोळशा कडेन संबंदीत ना. मात सत उक्तें जालें, अशें विरोधी पक्ष फुडारी युरी आलेमाव हांणी ट्विटराचेर ह्या प्रकरणांत प्रतिक्रिया दितना म्हणलें.
गोंय फॉरवर्डचे फुडारी विजय सरदेसाय हांणीय ट्विटरा वयल्यान केंद्र- राज्य सरकाराचेर टिका केली. कोळसो प्रदुशणान मुरगांव पयलींच उध्वस्त जालां. आतां हें सरकार वेळसांव पसून कुळें गांवूय नश्ट करपाचे तयारेंत आसा. गोंयकारांचो हो व्हड विस्वासघात आशिल्ल्याची टिका तांणी केली. मजगतीं, पर्यावरण मोगी आनी थळाव्या लोकांनी ह्या प्रकल्पाक सुरवाती सावन विरोध केलो. गोंयच्या संवेदनशील पर्यावरणाचेर आनी भलायकेचेर ह्या दोट्टीकरणाचो गंभीर परिणाम जातलो अशी तांची शिटकावणी आसा. मात केंद्र सरकारान उद्देगा संबंदी फायद्या खातीर लोकांच्या आक्षेपां कडेन आडनदर केल्ल्याचो आरोप विरोधकांनी केला.
प्रकल्पाचें काम 85-90 टक्के पुराय
रेल्वे दोट्टीकरण प्रकल्प 85-90 टक्के पुराय जालां. गोंय आनी कर्नाटकांतले प्रकल्प भूंय संपादनाक लागून आडकल्यात. ह्या प्रकल्पां खातीर 3,692 कोटी खर्च अपेक्षीत आसा. ह्या प्रकल्पाचें काम 26 जुलय 2012 ह्या दिसा सुरू जालें. प्रकल्प पुराय जावपाची आदली तारीख 27 जुलय 2016 आशिल्ली. भूंय संपादनाक जाल्ल्या कळावाक लागून हे तारखेंत प्रकल्प पुराय जावंक ना. प्रकल्प पुराय करपाची नवी मुजत आतां 31 डिसेंबर 2026 आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
