गोंय – हम्पी पर्यटनाक मेळटली चालना

भांगरभूंय | प्रतिनिधी

363 तल्या 312 किलोमिटर मार्गाचें दोट्टीकरण पुराय

भांगरभूंय । प्रतिनिधी

मुरगांव : दक्षीण- पश्चीम रेल्वेच्या हॉस्पेट ते वास्को दोट्टी मार्गाची सुरवात जाल्ल्याची घोशणा केंद्र सरकारान केल्या. हॉस्पेट, हुबळी, लोंढा, तिनईघाट ते वास्को ह्या 363 किलोमिटर अंतराराच्या रेल्वे मार्गाच्या 312 किलोमिटर मार्गाचें दोट्टीकरण जालां. कोळसो, लोह मीन आनी स्टीलाचे येरादारीक चालना मेळटली. ह्या मार्गाक लागून गोंय- हम्पी पर्यटनाक लेगीत चालना मेळटली.

हॉस्पेट आनी वास्को द गामा मेरेनच्या दोट्टीकरम प्रकल्पा खातीर दक्षीण0 पश्चीम रेल्वे विभागा मुखा वयली जमीन संपादनाची समस्या शेनवारा सुटल्या. गोंयचे मुख्यमंत्री डॉ. प्रमोद सावंत हांणी रान विभागा कडल्यान गरजेची आशिल्ली जमीन संपादन करपाची प्रक्रिया सोंपी करपाचें आस्वासन दिलें.

2010-11 च्या रेल्वे अर्थसंकल्पांत मंजूर जाल्लो, कर्नाटक आनी गोंय मेरेनच्या 352.28 किलोमिटर लांबायेचो होस्पेट- लोंढा- तीनईघाट- वास्को द गामा दोट्टीकरण प्रकल्प, रेल विकास निगम लिमिटेड (आरव्हीएनएल) वरवीं चालीक लायला. दुसरो रेल्वे मार्ग सुरू जाले उपरांत कर्नाटक, गोंय, आंध्र प्रदेश आनी महाराष्ट्राक ताचो फायदो जातलो. ताका लागून नवी दिल्ली वचपी अतिरिक्त गाडयो धांवपाक मजत जातली. आशियायी विकास बँक 2,127 कोटी रुपयांचो निधी ह्या प्रकल्पाक दिता. रेल्वे मंत्री पियुष गोयल आनी डॉ. सावंत हांणी एसडब्ल्यूआरचे म्हावेवस्थापक अजय कुमार सिंग हांचे सयत उच्च रेल्वे अधिकाऱ्यां वांगडा प्रकल्पाचो नियाळ घेतलो.

हो प्रकल्प दोन पांवड्याचेर विभागला. पयल्या पांवड्याचेर होस्पेट ते तिनईघाट मेरेनचो 252 किलोमिटराचो वाठार आस्पावला  जाल्यार दुसऱ्या पांवड्याचेर तिनईघाट ते वास्को ह्या मार्गाचो आस्पाव आसा. पयल्या पांवड्या वयलें सुमार 70 टक्के काम पुराय जालां आनी तें मार्च 2020 मेरेन पुराय जातलें. ह्या मार्गाचेर 200 किलोमिटर लांबायेचे धारवाड ते तिनईघाट, होस्पेट ते हरलापूर आनी बिनकडकाटी ते हेबसूर वेगवेगळे मार्ग आदींच सुरू केल्यात. तिनईघाट ते वास्को मेरेनचो नियोजीत भाग रान जमनींतल्यान वता. तातूंतली 10.45 हॅक्टर जमीन कर्नाटकांतल्या दांडेली रानवटी जीव राखीव वाठारांतल्यान आनी 52 हॅक्टर गोंयच्या भगवान महावीर रानवटी जीव अभयारण्यांतल्यान वता. एसडब्यूआरान दुसऱ्या पांवड्या वयलें काम बेगिनात बेगीन सुरू करचें, अशी इत्सा रेल्वे मंत्र्यान उक्तायल्या.

11.85 हॅक्टर खाजगी जमनींतली 2.3 हॅक्टर जमीन संबादीत करचे खातीर आदींच पयशे दिल्यात आनी जमीन हस्तांतरीत जावपाची वाट पळयतात. ह्या म्हयन्याचे निमाणे मेरेन ती मेळोवपांत मजत करपाचें आस्वासन मुख्यमंत्री डॉ. सावंत हांणी दिलां, अशी म्हायती सुत्रां कडल्यान मेळ्ळ्या.

आयज सरकार पुराय तरेन उक्तें जालें : सिमोयश

आयज सरकार पुराय तरेन उक्तें जालां. मुख्यमंत्र्यान सभाघरांत फट मारून एमपीएलांत कोळसो हाताळणी उणी करपाचें आस्वासन दिल्लें. फक्त कोळसो येरादारी खातीर दोट्टीकरण आशिल्ल्यान, सरकारान मुरगांव बंदर प्राधिकरणांत (एमपीए) कोळसो विस्तार दोन येवजण्यां खातीर पर्यावरणीय मंजुरी आदींच दिल्या. एके वटेन रान मंत्री विश्वजीत राणे म्हणटा, ते 10 वर्सां परस पोरणी झाडां मारपाक परवानगी दिवचे नात आनी दुसरे वटेन सरकार युनेस्को थळ आनी भगवान महावीर रानवटी जीव अभयारण्य नितळ करून नश्ट करपाक सोदता. सरकार गोंयांतल्या लोकां खातीर ना जाल्यार क्रोनी भांडवलदारां खातीर काम करता, हें दुखदिणें आसा, अशें ओलोंन्सियो सिमॉयश हांणी प्रतिक्रिया दिल्या.

कोळसो हबा खातीर सरकाराचे यत्न : कॅ. फर्नांडीस

केंद्र आनी राज्य सरकार गोंयाक कोळसो हब करचे खातीर यत्न करता. हॉस्पेट ते वास्को मेरेनचें रेल्वे दोट्टीकरण फक्त कोळसो हाताळणी खातीर केल्ल्याचें सिद्ध जालां. हाका पुराय तरेन मुख्यमंत्री डॉ. प्रमोद सावंत जापसालदार आसा. 2020 त कोवीड म्हामारी काळांत डॉ. सावंत हांणी रेल्वे मार्ग दोट्टीकरणाचें ताकतिकेन व्हिडियो कॉन्फरस्ना वरीवं उक्तावण करून दक्षीण गोंयाक कोळसो म्हामारींत उडयला. गोंय भाजप सरकार लोकांच्या हिता खातीर न्हय, जाल्यार अदानीच्या हिता खातीर काम करता, अशें दक्षीण गोंय खासदार कॅप्टन विरियातो फर्नांडीस हांणी सांगलें.