भांगरभूंय | प्रतिनिधी
पणजी : गोंय पुलिसांनी रस्ते अपघातांचो वाडपी आंकडो लक्षांत घेवन खर पावलां उबारल्यांत. राज्यभर जनजागृती उपक्रम राबयल्ल्यान नेम पाळी नाशिल्ल्या वाहनचालकांचेर खर कारवाय करतले. पुलिसांनी येरादारी संचालनालयाक पत्र बरोवन सोरो वा हेर जिन्नस खावन अपघाताक कारण थारिल्ल्या वा नेम पाळीनाशिल्ल्या ड्रायव्हरांचे परवाने निलंबीत वा रद्द करपाची मागणी केली.
2024 वर्सा गोंयांत वट्ट 440 गंभीर अपघात जाल्ले. जातूंत खुबश्या जाणांक आपलो जीव वगडावचो पडलो वा गंभीर दुखापती जाल्यो. 2025 वर्साय चिंता करपा सारकी वृत्ती कायम आशिल्ल्यान 30 जून मेरेन वट्ट 226 गंभीर अपघातांची नोंद जाल्या. तशेंच, फकत 2025 च्या पयल्या स म्हयन्यांनीच वट्ट 1.2 लाख येरादारी नेम मोडिल्ल्याची कागाळ नोंद जाल्ल्यान, हो आंकडो 2024 वर्साचो वट्ट 4 लाख नेम मोडिल्ल्यां मदलो सुमार 30 टक्के आसा.
गोंयच्या अपघातांचो चडश्या सुवातांचेर वेग मर्यादा मोडप, सोर्याचे घुवळेन वा घुवळे वखदां घेवन वाहन चलोवपी चालक, हेल्मेट आनी सीटबेल्ट वापरत ना ह्या कारणांचो व्हड वांटो आशिल्ल्याचें पुलिसांनी स्पश्ट केलें. कांय म्हयन्यां पयलींच राज्य सरकारान अशा वाहनचालकां आड ‘झीरो टोलरेन्स मोहीम’ जाहीर करून नेम मोडप्यांचेर बेगोबेग दंडात्मक कारवाय सुरू केल्ली.
रस्ते अपघातांचेर नियंत्रण हाडपा खातीर जन जागृताये वांगडा खर अंमलबजावणीचें धोरण आपणायतले, अशी शिटकावणी पुलिसांनी दिल्या. नागरीकांनी येरादारी नेम पाळून स्वता सयत हेरांचोय जीव वाटयलो, असो उलो पुलिसांनी मारलो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
