भांगरभूंय | प्रतिनिधी
नवी दिल्ली, खबरां संस्था: दिल्ली उच्च न्यायालयान बलात्कार प्रकरणाची सुनावणी करतना, अशा प्रकरणांत आरोपीची बदनामी करची, बलात्कार पिडेस्ताची न्हय. समाजान आपलें मत बदलचें, अशें म्हणलें.
शुक्रारा आरोपीचे याचिकेचेर सुनावणी करतना न्यायालयान हें निरिक्षण केलां. म्हजे आडचो खटलो रद्द जाल्यार पिडेस्ताची समाजीक कलंक आनी बदनामी सोंसची पडची ना, असो युक्तिवाद आरोपीन केल्लो.
पूण न्यायालयान हो वाद न्हयकारलो आनी आरोपीचेर 10 हजार रुपया दंड घालो. न्यायमूर्ती गिरीश कठपलिया ह्या प्रकरणाची सुनावणी करताले.
न्यायालयाचो आदेश, 2 मुखेल मुद्दे
दोश पिडेस्ताचेर घालचो न्हय, गुन्यांवकाराचेर घालचो. समाजान आपली मानसिकताय बदलूंक जाय. बलात्कार करप्याक लज दिसूंक जाय. इतले त्रास सोंसपी चलयेक न्हय.
हो वाद पुरायपणान चुकीचो, कारण अन्याय चलयेचेर जालो, तिच्या आवय-बापायचेर न्हय. फकत चली (पिडेस्त) गुन्यांवकाराक माफ करूंक शकता, तेंय कांय परिस्थितींत. वयर सांगिल्ले प्रमाण पिडेस्त अजून नेण्टे आसा.
नेमकें प्रकरण कितें?
हें प्रकरण २०२४ वर्साचें. आरोपीन नेण्टे चलयेचो व्हिडिओ केलो, उपरांत व्हिडियो वरवीं तिका ब्लॅकमेल केलें आनी तिचे कडेन शरीरिक संबंद दवरले. एफआयआरांत, आरोपी आड पोक्सो कायद्याच्या कलम ६ आनी भारतीय दंड संहितेच्या कलम ६५ (१) आनी १३७ खाला बलात्काराचो गुन्याव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
