हम होंगे कामयाब…

भांगरभूंय | प्रतिनिधी

आदले प्रधानमंत्री व्ही पी सिंग गोंयांत आयिल्ले तेन्ना तांचे पत्रकार परिशदेक आमी गेल्लीं. नौदळाच्या विमानतळार सोफार व्ही पी सिंग बशिल्ले. म्हाका सोफाच्या हातार बसचें पडलें.

हम होंगे कामयाब, हम होंगे कामयाब एक दिन, मन में है विश्वास, पुरा है विश्वास… हम होंगे कामयाब एक दिन… हम चलेंगे साथ साथ एक दिन…. ही कविता सगल्यांक सकारात्मकता, उमेद (जोश) दिवपी.
‘भांगरभूंय’ दिसाळ्या खातीर ‘ज्येश्ठनीत’ स्तंभाचें लिखाण करतना हांव आमी, सर, वरिश्ठ जातलें हें चिंतूंक नाशिल्लें. केरळ वरिश्ठ पत्रकार संघटनेच्या वांगड्यांनी म्हाका व्हाॅट्सअॅप ग्रुपांतल्यान भारतीय वरिश्ठ पत्रकार संघटनेचे बांदावळीत घुस्पयलें. ज्या वांगड्यांक हो वावर कसो करुंक येता तें मार्गदर्शन केल्लें तांची वळख म्हाका नाशिल्ली. तांच्या खांद्याक खांद लावन बसपाची संद मेळ्ळी तेन्ना ती घेत तांचे बराबरीन माचयेर बसलें. शांतीकायेचो मार्ग दाखयत व्ही.पी. एसजेएफआय (vp Sjfi) जालें. (उपाध्यक्ष- सिनीयर जर्नालिस्ट फेडरेशन आॅफ इंडिया)
आदले प्रधानमंत्री व्ही पी सिंग गोंयांत आयिल्ले तेन्ना तांचे पत्रकार परिशदेक आमी गेल्लीं. नौदळाच्या विमानतळार सोफार व्ही पी सिंग बशिल्ले. म्हाका सोफाच्या हातार बसचें पडलें. चार दसकांचे पत्रकारिते लागीं पावतना आयज ‘व्ही पी एसजेएफआय’ जालां. कितलो तेप उरतलें तें सांगूंक शकना, पूण म्हज्या ज्येश्ठांक ‘हम होंगे कामयाब’ हो विश्वास दिला.
एक राश्ट्र एक वेंचणुकेवरी देशांतल्या पत्रकारांक एक राश्ट्र एक पेन्शन, समाजिक सुरक्षा, माध्यम आयोग ह्यो एसजेएफआयच्यो मुखेल मागण्यो. हांव एसजेएफआय व्ही पी जालां हो एके धुवेचो भोवमान. उत्तराखंडांतले पत्रकार भाव प्रदीप फुटेला हांणी कुशळतायेन सांगलां. तांकां दिसता हांव गोंयचे पत्रकारितेचें देशव्यापी स्तंभ. गोंयच्या समाजाक, लेखकांक, सोयऱ्यांक गौरव. फेसबूक, ट्विटरच न्हय जाल्यार फेसलेस वेव्हज (ल्हारां) पत्रकारिता अंदूचे इफ्फीचो व्हड वांटो जावपाचीं आसात. विमानान बसून मोबायलाचेर स्तंभलिखाण करतना आमी सादूर रावपाक जाय हें कळ्ळें. विमान उंचायेर पावतना विमानात ज्येश्ठां परस युवावर्ग बोवाळ घालतना पळयलें. दुर्घटना जाल्यो तरी युवा भियेनासतना व्हडा प्रमाणात विमानान येता, वतात, आपले भितर रावपी समाज थंय आसता.
ज्येश्ठ, वरिश्ठांक विमानांत सुवात दाखोवपी युवा आसात, तशेंच तांची पर्वा करीनासतना तांकां धुकलून वचपीय आसात. विमानतळ आधुनिक जातात, विमानांची गर्दी वाडटना, प्रदुशण मळबांतय वाडटा हें सत. प्रदुशणांतल्यान विमानाचे हालींचे व्हड अपघात जाल्यात व्हय? ते विशींचे नियाळ बेगीन, अभ्यासा बगर येतात व्हय? आत्र्या पयऱ्यान विमानाक अपघात जावपाच्यो खबरो मोबायलार मेळटात. त्यो अचूक, फट हें तपासपाची जापसालदारकी वाचप्यांची.
तिरुवनंतपुरमातले ज्येश्ठ पत्रकारांचे बसकेक वतना गोंयच्या दाबोळी विमानतळा लागीं भोव मजली बिल्डिंगो दिसल्यो. विमानांत सरळ वचून बसूंक येता, तंत्रज्ञानांत शेणिल्ल्या राखण्यांची आडमेळीं अस्तुरी बरेतरेन सांबाळटा हें भोंवडेंत कळ्ळें. तांचो भेस बदलपाची गरज आसा अशें म्हाका दिसता. तांचेरय एकादरे अॅसिड हल्ले जांव येतात, पूण अस्तुरेक भिवपाची गरज ना. तोच तर कामयाबीचो (जैताचो) मंत्र हांवें गोंयां सावन दिलो देशांतल्या ज्येश्ठ पत्रकारांक. ‘एकवट राखल्यार जिखतले, विखुरल्यार कोंसळटले’ हो ज्येश्ठांचो मंत्र माचये वेल्यान दिलो, भासाभासेंत वांटो घेवन.
परिशदेक निरोप दितना कितें म्हणप जितीन? हें हांवें वॉटसअॅपार विचारल्लें. जितीन कोण? एक केरळी युवक तीस- बत्तीस वर्सांचो. केरळच्या एका जिल्ल्यातलो उद्येजक. म्हजे धुवेन रोहिणीन पुण्याक नोकरी करतना जितीनाक मेंटरींग (शिकयल्लें) केल्लें. नन्नी. गोंयचे आदले राज्यपाल केरळचे पूत श्रीधरन पिल्लय हांकां पुस्तकां दितना हांवें वृत्त स्वातंत्र्या परस भारतीय स्वातंत्र्य व्हड आसा हें सांगलें. नन्नीक जाप नमस्तेंतल्यान मेळ्ळी. केरळचे भूंयपूत पिल्लय म्हाका खीण दोन खीण पळेत रावले. स्वमूत्रपथी पुस्तकांत आदले प्रधानमंत्री मोरारजीभाई देसाय आसात हें तांकां सांगतना हांव ल्हान जाल्लें.
केरळांत गेल्लें थंय पूत, धूव, जांवय फाटल्यान आशिल्लीं. हांवें तांका जाप हय, न्हय, व्हिडिओ फोटवांनी दिली. तूं व्हड, देशव्यापी कशी जाली? हांची उमळशीक तांकांच न्हय देसांतल्या पत्रकारभाव, भयणीक आसतली. सादो भेस, कोंकणी, हिन्दी, इंग्लेज भास आनी माचयेवेल्यान ही म्हजी जाप. वतना पायांत घाल्ले बूट ना हें गोंयांत अभिजिताक दिसलें. बूट खंय गेले ती काणी ताका सांगली. तो फकत हांसलो. भिवपाची गरज ना एक कित्याक दोन बुटांचे जोड हाडूं येतात हो विश्वास ताका आशिल्लो. केन्ना केन्ना उतराक उतर लावन वाद घालतात निमणे आवय, पूत, धूव एक. भुरग्यांक बापायचो, आवयचो हुस्को आसता, पयस आसूनय तीं तांकां वाऱ्यार उडयनात.
ज्येश्ठ दिव्यांग जावंक ना ही म्हजीं उतरां परिशदेंत माचयेवेल्यान गेल्लीं. उत्तराखंडातल्या प्रदिप फुटेलाक कळ्ळीं, ताणें म्हाका आपले खबरेतल्यान व्हड केलें. भाई (दामोदर) मावजो हांणी एके वळींत ‘तूं एसजेएफआयचें अध्यक्ष रोखडें जावचें’ अशी मेसेज म्हाका धाडल्या. साॅरी सध्या हांव एसजेएफआयचें “पी” जावचें ना. म्हाका राज्य एसजेएफआयची नवी बांदावळ करपाक जाय. लेखक, गांवांगांवांतल्या पत्रकारांच्यो अडचणी समजून घेवपाक जाय. गोंय जायतें बरें, देसांतल्या 10- 12 राज्यांनी पत्रकार कल्याण निधी येवजण ना, हें परिशदे खातीर मांडावळ करतना कळ्ळां.
गोंयच्यान माध्यमांतली ज्येश्ठ आकाशवाणी, चक्रव्यूह, खेळां पत्रकार आशिल्ले. विमानाच्या पांख्यार बसोवन केरळांतले तिरुवनंतपुरमातले पत्रकारांचे बसकेक वतना हांव जापसालदार जाल्लें. हांव माचयेर आसतना खेळां, खबरींनी तांची जतनाय घेतली. हांव देशव्यापी उपाध्यक्ष जातां तो खीण तांणी पळयलो.
माचयेर 10 – 12 वरां बसप पिरायेचे साठी उपरांत शक्य नासता, हांव बसूंक शकता. स्वमूत्रपथी म्हजी साथी. ती केरळचे ज्येश्ठ पत्रकार भाव फ्रँको लुईस, एसजेएफआयचे अध्यक्ष वरिश्ठ पत्रकार संदीप दीक्षित (राजकारणी न्हय) हांकां स्वमूत्रपथी पुस्तक दिलें. कोण कितलो उपेग करतलो तें नकळ. दिल्लीचे संदीप, केरळचे पत्रकार गौरीदासन नायर, एन चेकुट्टी, सेवंती निन्नन केरळीच, हांव गोंयकार. संदीप सगल्यांक राजकारणी दिसतले. पत्रकार संदीपाचे न्हय दिल्लींतले राजकारणी संदीप दिक्षीत हांचे फोटे म्हणून छापून हाडटात. ती जाणवीकाय हांवें संदिपाक ते वेंचून आयले तेन्नाच करुन दिल्ली. छापून येतकीर हांवें स्पश्टीकरण दिवंक लायलें.
म्हजें आडनांव ‘प्रभुगोवेकार’ अशें केरळ, कर्नाटक, मद्रास, आंध्रांत गेलां. आडनांवांत गोंय आसाच, गोंयचे धुवेक जांणी व्हड केलें तांकां हांव कशें विसरुं? नन्नी केरळा. उटा ऐतू, थर्स्ट ही उतरां म्हजीं, अचूक. हेच ज्येश्ठनीतींत हांव फुडें वचपाची वाट म्हाका गोंय कोंकणी अकादमीचे अध्यक्ष पूर्णानंद च्यारी, आमदार गोविंद गावडे, पर्यटनमंत्री रोहन खंवटे ह्या तरणाट्यांनी दाखयल्या. तांकां सकारात्मकतेचो मंत्र परतून दितना आमी चवथ सकारात्मक करुया हो मंत्र दितां. तो गोंयचे आदले मुख्यमंत्री मनोहर पर्रीकार हांचो. तांच्या फाटल्यान लागून हेडलायनी मेळयतना पायांक हात लावंक नाकात हो मंत्र हांव तरणाट्यांक दितलें.
खांद्याक खांद लावप, खांद दिवपाक शिकोवपी भाजपाचे पयलींचे अध्यक्ष विश्वनाथ आर्लेकार हांचे पूत राज्यपाल राजेंद्र आर्लेकार शिक्षणांतल्यान व्हड जाल्यात. ते भाई, म्हजे दादा. ती ज्येश्ठनीत ताई भाईंची, भारतीयत्वाची, एकचार, समानतेची.

सुहासिनी प्रभुगांवकार
9881099260