अमित, जास्मीन सेमी फायनलींत

भांगरभूंय | प्रतिनिधी

इंग्लंडाच्या बर्मिंहॅमांत चालू आशिल्ले राष्ट्रकूल खेळां सर्तींत भारताचे बॉक्सर रंगान आयल्यात.  

बॉक्सिंगेंत भारतान आतां मेरेन पांच पदकां निश्चीत केल्यात. काल अमी पंघल आनी जास्मीन लांबोरिया हांणी दोळेदिपकावपी कामगिरी करीत उपांत्य फेरयेंत सुवात मेळयली.   

तांचे पयलीं निखत झरीन, नीतू घंघस आनी हुसामुद्दीन मोहम्मद हांणी लेगीत निमाण्या चारांनी सुवात मेळयल्या.
अमीतान काल दादल्यांच्या 51 कील वजनाच्या फ्लायवेट प्रकारांत स्कॉटलॅण्डाच्या लेनन मुलिगनाक 5-0 अशा फरकान हारयलो. जाल्यार जॅस्मिनान 60 कील वजन गटांत न्युझिलॅण्डाच्या ट्रॉय गार्टेनाक 4-1 फरकान हारयलो.

पयले फेरयेंत अमीत पंघल आड पंचांनी दिल्ल्या 9-10 असो निकाल वगळायलो जाल्यार भारताच्या बॉक्सरान दरेक फेरयेंत प्रतिस्पर्धी खेळगड्याचेर आपलो शेक दवरलो. 26 वर्सां पिरायेच्या अमितान हाचे पयलीं रावण्ड 16त लेगीत 5-0 अशी मॅच जिखून उपांत्यपुर्व फेरयेंत सुवात मेळयिल्ली.

अमित पंघल हो संवसारीक बॉक्सींग वस्तादपण सर्तींत रुप्या पदक जिखपी पयलो भारतीय दादलो बॉक्सर आसा. अमित खेरीत स भारतीय दादले बॉक्सींग खेळगड्यांनी संवसारीक वस्तादपण सर्तींत कांश्या पदक जिखिल्लें.

मजगतीं, अंदूंचे राष्ट्रकूल खेळां सर्तींत भारतान आतां मेरेन 18 पदकां जिखल्यात. हातूंत पांच भांगरा पदकां, स रुप्या पदकां आनी सात कांश्या पदकांचो आस्पाव आसा.

वेटलिफ्टिंगेंत 10, ज्युडोंत तीन जाल्यार लॉन बॉल, टेबल टॅनीस, बॅडमिंटन, अॅथलेटिक्स आनी स्क्वॉश हातूंत भारताक दरेकी एक पदक फावो जालां.

भारताच्या हॉकी पंगडाक 4-1 जैत

भारताच्या दादल्यांच्या हॉकी पंगडान ब गटांतले आपले निमाणे मॅचींत वेल्साक 4-1 फरकान हारयलो. भारता वतीन हरमनप्रीत सिंगान हॅट्रीक केली. ह्या जैता सयत भारतान सेगीत चवथे खेपे राष्ट्रकूल खेळां सर्तीचे सेमी फायनलींत सुवात मेळयली.

भारतान मॅचीक आक्रमक सुरवात केली. हरमनप्रीतान दोन पॅनल्टी कॉर्नरांची गोलांत रुपांतरीत करून भारताक मध्यांतरा मेरेन 2-0 अशी आघाडी मेळोवन दिली. दुसऱ्या अर्दांत हरमनप्रीत आनी गुरजंत सिंग हाणें दरेकी एक गोल करून भारताची आघाडी 4-0 अशा फरकान वाडयली. चवथ्या क्वॉर्टरांत वेल्स पंगडा वतीन जेरेथ फर्लागॅंनान एकोडो गोल केलो.

भारतान पयले मॅचींत घानाक 11-0 फरकान, जाल्यार तिसरे मॅचींत कॅनडाक 8-0 अशा गोल फरकांनी हारयिल्लो. इंग्लंडा आडचे दुसरे मॅचींत भारताक 4-4 अशा बरोबरीचेर समाधान मानचें पडिल्लें.

राष्ट्रकूल खेळां सर्तीच्या इतिहासांत भारताच्या दादल्यांच्या हॉकी पंगडान केन्नाच भांगरा पदक जिखूंक ना. 

हाय जम्पर तेजस्वीन शंकरान घडयलो इतिहास

हाय जम्पर तेजस्वीन शंकरान राष्ट्रकूल खेळां सर्तींत भारताक अॅथलेटिक्सांत हाय जम्प प्रकारांत पयलें पदक जिखून दिलें. 23 वर्सां पिरायेच्या तेजस्वीन शंकरान दादल्यांच्या हाय जम्प प्रकारांत 2.22 मिटराचो स्कोर करून कांश्या पदक जिखलें.

खेळां सर्त सुरू जावपाक तीन दीस आसतना बर्मिंहॅमांत पाविल्लो. अॅथलेटिक्स फॅडरेशन ऑफ इंडियान ताका भारताच्या पंगडांतल्यान भायर काडिल्लो. ताणें भारताचे राष्ट्रीय आंतर राज्य सर्तींत वांटो घेवंक नाशिल्लो. ही सर्त जाल्ली त्या वेळार तो अमेरिकेंत सराव करतालो. तेजस्वीन कोर्टांत गेलो आनी कोर्टान ताका सर्तींत वांटो घेवपाक परवानगी दिवपाचो आदेश दिलो. भारताच्या दळांत वांटेकार जावपी तो निमाणो अॅथलीट आशिल्लो.