भांगरभूंय | प्रतिनिधी
पणजी ः फाटले दोन दिस पडपी उटंगाराच्या पावसाक लागून पणजे आनी भोंवतणच्या वाठारांतले रस्ते परतून उदकापोंदा गेल्यात. पणजे बस स्टँण्ड आनी भाटले वाठारांतल्या रस्त्यांनी फोंडकुला पडल्यात. चवथीच्या आदल्या दिसा पालिकेन केल्लो पॅचवर्क कांय दिसां भितर धुवन गेल्ल्यान चालकांक व्हड समस्या निर्माण जाल्या.
पोन्टे दे लिन्हारेस (पोरणो पाटो ब्रिज) ते फोर पिलर्स चौका मेरेन वचपी रस्त्याचेर चड परिणाम जाला. फाटल्या सप्तकांत रस्त्यार घातिल्ले डांबर पावसान व्हांवून गेल्ल्यान रस्त्यार व्हडली फोंडकुला पडल्यात. जाका लागून वाहन चालकांक ह्या रस्त्या वयल्यान प्रवास करप कठीण जालां. पणजे केटीसी बस स्टँण्ड वाठार काल दीसभर धोंपरा मेरेन उदक आशिल्लें. ह्या वाठारांतल्यान यो- वच करतना चालकांक बरेंच त्रास जालें. कांपाल वाठारांतल्या नव्या फुटबॉल स्टेडियम लागसारच्या रेसिडेन्सी वाठारांत वचपी रस्त्यार चिखल जाल्लो.
भाटलें वाठारांतल्या रस्त्यांचेर केल्ले पॅचवर्कूय व्हांवून गेलां. भाटले मशिदी सावन लागसारच्या सेंट फ्रांसिस झेवियर चॅपल मेरेन सुमार एक किलोमीटर वाठार फोंडकुलांनी गच्च भरिल्लो आसा. ‘स्मार्ट सिटी’ प्रकल्पा खाला सांडपाणी यंत्रणेचें काम जाले उपरांत रस्तो पुराय जावंक नाशिल्ल्यान परिस्थिती आनीक वायट जाल्या. मजगतीं, शारांतलो मुखेल 18 जून रस्तो व्हड पावसांत लेगीत सुरक्षीत उरलो. मजगतीं, सध्याच्या हवामानाक लागून रस्ते दुरुस्त करपाक आडमेळीं येतात अशें पालिका अधिकाऱ्यांनी सांगलें. एक-दोन दीस सुकें हवामान आसल्यार फोंडकुला भरपा खातीर परतून कामगार धाडटले आनी फोंडकुला पुरयतले अशें एका वरिश्ठ अधिकाऱ्यान सांगलें.
कंत्राटदाराचेर कारवाय जातली?
काय म्हयन्यां पयलीं रस्तो इबाडल्यार कंत्राटदारा कडल्यान तो फुकटांत परत तयार करून घेवपाचें थारिल्लें. तांकां काळे वळेरेंत घालपाचें जाहीर केल्लें. ताचें कितें जालें, असो प्रस्न लोकांनी विचारला. मजगतीं, पर्वरी उड्डाण पुलाचे काम चलता थंयचे रस्ते सामके इबाडल्यात. विशेश म्हणल्यार जंय सध्या काम चलतना थंयचेय रस्ते फोंडकुलांनी भरल्यात. पयर एका जाग्यार पडिल्ल्या फोंडकुलांत दुचाकी पडून कोणाक मरण येवचें न्हय, म्हूण कोणेतरी थंय मोडकी कदेल दवरिल्ली. उदक भरिल्ल्यान तें व्हडलें फोंडकूल दिसना.
मजगतीं, रस्तो बंद करचे परस उड्डाण पुलाचें काम रातचेंच करचें अशी लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
