मुंगूल गँगवॉर प्रकरण: आनीक दोग दुबावितांक घेतले ताब्यांत

भांगरभूंय | प्रतिनिधी

मडगाव : मुंगूल घडिल्ल्या गँगवॉर प्रकरणांत फातोड्ड्यां पुलिसांनी आनीक दोग दुबावितांक ताब्यांत घेतल्यात. राजस्थानच्या ओमसा ह्या दुबाविताक आनी बोरयेच्या सुरज नायक बोरकार हाकाय अटक केल्या. न्यायालयान तांकां सात दिसांची बंदखण आयकयल्या. उपरांत ह्या प्रकरणांत अटक जाल्ल्या दुबावितांचो आंकडो २३ वयर पावला. आनीक कांय जाणांक अटक करपाची शक्यताय आसा अशें पुलीस सुत्रांनी सांगलें.
१२ ऑगस्टाक मुंगूल माडेलच्या शगुन हॉटेला लागसारा एके गाडयेचेर तलवार, कोयते, सोडा बॉटली वापरून हल्लो केलो. ह्या वेळार फारपेटूय जाली. हो प्रकार गँगवॉर आशिल्ल्याचें पुलिसांनी स्पश्ट केलें. हे घडणुकेंत रफीक ताशान (२४) आनी युवकेश सिंग बदैला (२०) हे गंभीर जखमी जाल्यात.
दक्षीण गोंय पुुलीस अधीक्षक टिकमसिंग वर्मा हांच्या नेतृत्वा खाला तयार केल्ल्या विवीध पंगडांनी दक्षीण गोंय, उत्तर गोंय तशेंच राज्या भायर कारवाय करीत दुबावितांक अटक केली. ह्यान पयलीं अटक केल्ल्या मदीं विल्सन कार्व्हालो, शाहरुख शेख (रा. दवर्ली), रसूल शेख (रा. मडगांव), मोहम्मद अली (२४), वासू कुमार (२४), सूरज माझी (१९), मलिक शेख (१८), गौरांग कोरगांवकार (२४), सुनील बिलावर (२०, रा. घोगळ, मडगांव), जॉयस्टन फर्नांडीस (२०, नेरुल) हांचो आसपाव आसा. तशेंच इम्रान बेपारी (३८, रा. सांताक्रुझ), अक्षय तलवार (२२, रा. ताळसाझर), अविनाश गुंजीकर (३१, रा. नावेले), परशुराम राठोड (३२, रा. बेळगांव), दीपक कट्टीमणी (४७, रा. आके बायश), अमर कुलाल, ताहीर, सलीम हांकांय अटक केली.
हातुंतलो दीपक कट्टीमणी हो सरकारी कर्मचारी आशिल्ल्यान तांणी दुबावितांच्या संपर्कांत रावन तांच्या रावपाची वेवस्था केल्ल्याचें पुलीस तपासांत स्पश्ट जालें. तांणी जामीन घेवपा खातीर न्यायालयांत अर्ज सादर केलो. मजगतीं, शेनवारा रातीं फातोड्डा पुलिसांनी महेंद्र नायक (२१, रा. चिंबल), राहुल तलवार (जाचेर लुकआवट नोटीस आशिल्ली) आनी मंदार प्रभू गांवकार (बोरी) हांकां अटक केली. उपरांत फोंडें वाठारांतल्यान सुरज नायक बोरकार हाका अटक केली. ताचे कडल्यान हल्ल्यांत वापरिल्ली इनोव्हा गाडी जप्त केली. तेन्नाच राजस्थानच्या ताब्यांत घेतिल्लो ओमसा हो राज्या भायल्या गुन्यांवकारांच्या संपर्कांत आशिल्ल्याचें समजलें. हे विशींचो तपास सध्या चालू आसा.