भांगरभूंय | प्रतिनिधी
पणजी: गोंयांत दोन दीस पावसान खवदळ घालो. फाटल्या चोवीस वरांत अंदूंच्या हंगामांतलो विक्रमी पावस पडलो. गोंयांत कांय कडेन झाडां पडून लुकसाण जालें. खूबश्या रस्त्यांचेर उदक सांचून उरलें. पावसान विवीध न्हंयांचे पातळेंत गतीन वाड जाली. विठ्ठलापूर सांखळे व्हाळवाट न्हंयचे पात्र भरून व्हांवतालें. दुदसागर न्हंयेक हुंवार आयिल्ल्यान निरंकाल दावकोण हांगासरले रस्ते उदका खाला गेले.
गोंयांत बिरेस्तारा सकाळीं 8.30 मेमरेन सोंपिल्ल्या चोवीस वरांत गोंयांत सरासरी 6.38 इंच पावसाची नोंद जाली. मजगतीं सांखळे 8.12 इंच, सांग्यार 7.48 इंच, फोंड्यां 7.31 इंच, केप्यां 7.08 इंच, धारबांदोड्यां 6.94 इंच, म्हापश्यां 6.77 इंच, पोरणें गोंयां 6.39 इंच, काणकोणां 6.09 इंच, पणजे 5.75 इंच, मुरगांवां 3.75 इंच जाल्यार दाबोळे 3.65 इंच पावसाची नोंद जाली.
1 जून ते 28 ऑगस्ट मजगतीं सरासरी 109.22 इंच पावसाची नोंद जाली.
गोंयांत मंगळार सांजवेळा सावन पावसाचो नेट वाडत गेलो. चवथीच्या दिसा लेगीत पावसान नेटाची हाजेरी लायली. बुधवारा रातीं तशेंच बिरेस्तारा फांतोडेर उटंगाराच्या पावसाची नोंद जाली. पावसान पणजेंतलो दयानंद बांदोडकार रस्तो, मिरामार जंक्शन, कंदब वाठार हांगासरल्या कांय रस्त्यांचेर उदक सांचून उरलें. शारांतल्या फोंडकुलांक लागून वाहन चालकांक तकलीफोड जाली. बिरेस्तारा दनपारां उपरांत पावसाचो नेट उणो जायत गेलो. थोडो वेळ वतूय पडिल्लें.
गोंयांतल्या 14 पैकीं 8 केंद्रांनी शेंकडो
गोंयांत 1 जून ते 28 ऑगस्ट मजगतीं, 14 पैकीं 8 केंद्रांनी पावसान शेंकडो पुराय केलो. वयल्या काळांत सांग्यार 143.62 इंच, धारबांदोड्यां 143.53 इंच, केप्यां 134.14 इंच, वाळपयंत 131.46 इंच, फोंड्यां 116.48, सांखळे 113.10 इंच, काणकोणां 105.50 इंच जाल्यार पोरणें गोंयां 103.51 इंच पावसाची नोंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
