भांगरभूंय | प्रतिनिधी
भांगरभूंय । प्रतिनिधी
वाळपयः भिरोंडें पंचायत वाठारांतली अडवय प्राथमीक शाळेचें डोंगरवाडो वांतें शाळेंत विलीन करपाक पालकांनी खर विरोध केला. विरोध आसतनाय सरकारान शाळा विलीन केल्यार आमच्या भुरग्यांक खाजगी शाळांनी घालपाची शिटकावणी पालकांनी दिल्या. ह्या विशयाचेर चर्चा करपा खातीर पालक-शिक्षक संघाची खासा बसका घेवन शाळेचे वर्ग दुसरे कडेन व्हरपाक विरोध केला.
वाळपयच्या एडीआयक निवेदन सादर करतले अशी म्हायती पालक-शिक्षक संघाची अध्यक्ष सुमेधा देसाय हिणे दिली. बसकेंत संगीता गांवकार, विभा राणे, अमोल गांवकार, प्रियांक गांवकार, राधाबाय देसाय, युवराज देसाय, सखाराम देसाय, अभिषेक देसाय हांणी बसकेंत सरकारी निर्णयाचेर भासाभास केली.
अडवय शाळेंत 21 विद्यार्थी आसात. 15 परस उणे विद्यार्थी आसल्यार शाळेचें स्थलांतर करपाचे केंद्र सरकारान सांगिल्लें. अडवय शाळेंत ताचे परस चड विद्यार्थी आसतना तिचें स्थलांतर कित्याक करतात असो प्रश्न सुमेधा देसाय हिणे केला. वातें शाळेंत वचपा खातीर अडवयच्या भुरग्यांक पांच किलोमीट अंतर चलून वच्चें पडटलें ते खातीर स्थलांतर करचें न्हय अशी पालकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
