भांगरभूंय | प्रतिनिधी
पावसांतल्या आनी गिमांतल्या पिकांक फटको
समीप नार्वेंकार, पणजी : फाटल्या वर्साचे तुळेंत वर्स २०२४-२५ वर्सा राज्यांत तांदूळ तशेंच कड्डणाच्या उत्पन्नांत १८ हजार परस चड टनांनी उणाव नोंद जाला. दर हॅक्टरा फाटल्यान तांदळाचे पिकावळींत ५६५ किलो जाल्यार कड्डणाचे पिकावळींत ६२ किलो इतलो उणाव नोंद जाला, अशी म्हायती शेतकी संचालनालयांतल्या वरीश्ठ अधिकार्यान दिल्या.
अधिकार्यान दिल्ले म्हायती प्रमाण वर्स २०२३-२४त पावसाळी आनी वायंगण शेतांत ९८,४४३ टन तांदूळ आनी कड्डणाच्या पिकावळीची नोंद जाल्ली. फाटल्या हंगामांत वर्स २०२४-२५त ८०,१२८ टन तांदूळ आनी कड्डणाच्या पिकावळीची नोंद जावन १८,३२० टन इतलो उणाव नोंद जाला.
वर्स २०२३-२४त पावसाळी हंगामांत २३,४५५ हॅक्टर वाठारांत भाताची लागवड जावन दर हॅक्टर २८८६ किल इतलो तांदूळ पिकलो आनी ६७,६९८ टन इतली पिकावळ नोंद जाली. जाल्यार गिमाळ्या हंगामांत ९०२२ हॅक्टर क्षेत्रांत भाताची लागवड जावन दर हॅक्टर २९८३ किल इतलो तांदूळ पिकलो आनी २६,९१३ टन इतली पिकावळ नोंद जाली.
वर्स २०२४-२५सात पावसाळी हंगामांत २३,८७८ हॅक्टर वाठारांत भाताची लागवड जावन दर हॅक्टर २१७१ किल इतलो तांदूळ पिकलो आनी ५१,८४८ टन इतली पिकावळ नोंद जाली. जाल्यार गिमाळ्या हंगामात ८,७३५ हॅक्टर क्षेत्रात भाताची लागवड जावन दर हॅक्टर २,८३२ किल इतलो तांदूळ पिकलो आनी २४,७४१ टन इतली पिकावळ नोंद जाली.
राज्यात कड्डणांची पिकावळ ही गिमाळ्या शेता वेळार काडटात हातूंत चडश्या हळसांदे हे पिकाचो आस्पाव आसता. वर्स २०२३-२४त ३३८५ हॅक्टर क्षेत्रात कड्डणाची लागवड जावन दर हॅक्टर ९८६ किल इतलो कड्डण तयार जावन ३८२२ टन इतली पिकावळ नोंद जाली. जाल्यार वर्स २०२४-२५सात ३८२९ हॅक्टर वाठारांत कड्डणाची लागवड जावन दर हॅक्टर ९२४ कील इतलो कड्डण तयार जावन ३५३९ टन इतली पिकावळ नोंद जाली. २८३ टन इतलो उणाव हे खेपे नोंद जालो.
फाटल्या वर्साचे तुळेंत वर्स २०२४-२५त पावसाळी हंगामांत भाताचे लागवडींत ४२३ हॅक्टर इतली वाड जाल्ली. मात पिकावळीत १५,८५० टन इतलो उणाव नोंद जालो. गिमाळ्या हंगामात भाताचे लागवडीत २८७ हॅक्टर इतली उणाव जावन पिकावळीत लेगीत २,१७२ टन इतलो उणाव नोंद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
