भांगरभूंय | प्रतिनिधी
गरिबी रेशे वयलीं नवीं १०० कार्डां तयार
समीप नार्वेंकार, पणजीः लावार्थ्यांचे उत्पन्न मर्यादेंत वाड जाल्ल्यान राज्यांत फाटल्या देड म्हयन्यांत ४०० परस चड रेशन कार्डां सरेंडर जाल्यांत. तातूंत सगळ्यांत चड गरिबी रेखे सकयलीं एनएफएसए ८९ टक्के कार्डां जाल्यार, गरिबी रेखे वयलीं १० टक्के कार्डां सरेंडर जाल्ल्यांत .
मजगतीं राज्यांत सुमार १०० नवी गरीबी रेखे वयलीं रेशन कार्डां तयार जाल्यांत, अशी म्हायती नागरी पुरवण खात्याच्या अधिकार्यान दिल्या.
अधिकार्यांनी दिल्ले आंकडेवारी प्रमाण आतां मेरेन २.६२ लाखा परस चड रेशन कार्डां राज्यांत सक्रीय आसात. तातुंतलीं राष्ट्रीय अन्न सुरक्षा कायदो (एनएफएसए) सकयल पीएचएच आनी एएव्हाय १.२४ लाख कार्डां आसात जाल्यार गरिबी रेखे वयर (एपीएल) १.३७ लाख कार्डां आसात.
फाटल्या देड म्हयन्यांत राशन कार्डांच्या सरेंडर जावपांत बरीच वाड नोंद जाल्या. एनएफएस खाला येवपी वट्ट ३८७ कार्डां सरेंडर जाल्यांत. गरीबी रेखे वयलीं ४४ कार्डां सरेंडर जाल्यांत. हे मजगती ३८७ मदल्या लावर्थ्यांनी एनएफएसए कार्ड सरेंडर करून परत गरिबी रेखे वयल्या कार्डांक अर्ज केल्ल्यान गरिबी रेखे वयलीं नवीं १०३ कार्डां तयार जाल्यांत. हीं सगलीं १०३ कार्डांं उत्तर गोंयांत तयार जाल्यांत आनी दक्षीण गोंयांत सगळीं कार्डांं सरेंडर जाल्यांत.
सरकारान राशन कार्डा खातीर इ-केव्हायसी सक्तीचें केल्ल्यान लावार्थ्यांच्या उत्पन्नाची म्हायती सरळ सरकाराक मेळटा आनी तांचेर चाबूक मारपाक सरकाराक सोंपे जाता. ज्या घराब्यांचें वर्सुकी उत्पन्न मर्यादा ५० हजार ते एक लाख मजगतीं (एससी/एसटी खातीर) हुपल्या तांणी आपली एनएफएसए कार्डां सरेंडर केल्यांत. जाल्यार ज्या घराब्यांचें ५ लाख वर्सुकी उत्पन्न मर्यादा हुंपल्या तांणी गरिबी रेखे वयलीं कार्डां सरेंडर केल्यांत, अशी म्हायती अधिकार्यान दिली.
मजगतीं १०३ गरीबी रेखे वयल्या कार्डांची वाड जावपा फाटल्यान एक फामिलीचे दोन वाटे जावन वेगळें जाल्ले फामिलीन आपलीं नवीं कार्डां तयार केल्यांत. तशेंच तीन म्हयन्यां परस जे लोक रेशन घेनात तांचें रेशन कार्ड बंद करून दवरतात. उपरांत ते नागरी पुरवण खात्याचे जिल्लो कचेरेंत येवन लाव परत मेळोवपा खातीर ते नव्यान सक्रीय करतात. तशेंच जांणी एनएफएसए कार्ड सरेंडर केलां तांणी गरीबी रेखे वयलें कार्ड घेतलां, अशें अधिकार्यान सांगलें.
उत्तर गोंयांत एनएफसए सकयल येवपी २४६ नवीं राशन काडार्ंं सरेंडर जाल्यांत जाल्यार दक्षीण गोंयांत १४१ राशन सरेंडर जाल्यांत. तशेंच उत्तर गोंयांत एपीएल १०३ नवीं कार्डां तयार जाल्यांत आनी दक्षीण गोंयांत ४४ नवीं रेशन कार्डा सरेंडर जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
