भांगरभूंय | प्रतिनिधी
’पाकिस्तान’च्या बुडिल्ल्या अवशेशांक लागून धोको
पणजी : मुरगांव पोर्ट प्राधिकरणाच्या (एमपीए) हद्दींत लोखणाच्यो प्लेट्स घेवन वचपी एक बार्ज बुडली. बार्जींत आशिल्ल्या आठूय खलाशांक वाटयले. उदका पोंदचे बोटीच्या जहाजाच्या अवशेशांक आपटल्ल्यान ही घडणूक घडली.
बार्ज बंदरांत उब्या आशिल्ल्या बोटींक लोखणाच्यो प्लेट्स पावोवपा खातीर वतना उदका पोंदचे बोटीच्या अवशेशाक आपटली. हातूंत बार्जीच्या तळाक व्हड बुराक पडलो आनी तातूंत उदक भितर सरलें, अशी म्हायती सुत्रांनी दिली. उपरांत खलाशांक बेगोबेग भायर काडिल्ल्यान तांचो जीव वाटवलो. धपको बसले उपरांत बार्ज उदका पोंदच्या अवशेशांक आडकून उरलो. बार्ज धनयान फ्लोटींग क्रेनीचे मजगतीन तो भायर काडपाचो यत्न केलो, पूण नेटान येवपी वार्याक लागून आनी दर्यो खवदळिल्ल्यान ही मोहीम मुखार धुकल्ली, अशें सुत्रांनी सांगलें.
’पाकिस्तान’ नांवाचो अवशेश धोको निर्माण करपी
एमपीएच्या हद्दीत आदल्या बोटींचे अवशेश आजून आशिल्ल्या थळाव्यांनी चिंता उक्तायली. कांय वर्सां पयलीं खवदळिल्ल्या उदकांत बुडिल्ल्यान दोन बोटीं मदल्या एक अवशेश एमपीएन काडलो. तरी, ’पाकिस्तान’ म्हणून वळखपी दुसरो अवशेष अजूनय थंयच आसा. जायत्या वर्सां सावन हो अवशेश बार्ज, नुस्तेंमारी बोट आनी ल्हान बोटीं खातीर अपघाताचें कारण थारता अशें सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
